देवळा : येथील शिवस्मारकाजवळ संजय पाटील दिग्दर्शित ‘एकदम पक्का-भाऊचा धक्का’ या चित्रपटाचे चित्रीकरण शनिवारी (ता. ७) झाले.

टेक... रोल... ॲक्शन.... चा आवाज, कलाकारांचा अभिनय आणि प्रेक्षकांची गर्दी यामुळे हा भाग फुलून गेला होता. विजय पाटकरसह इतर कलाकार आकर्षणाचे केंद्रबिंदू ठरले. (Filming of Ekdam Pakka Bhau Cha dhakka in deola central attraction chhatrapati shivaji maharaj memorial Nashik News)

देवळा शहराच्या मध्यवर्ती ठिकाणी शिवस्मारक उभे राहिले आहे.

गडकिल्ल्यांच्या रूपातील चौथरा, त्यावर भव्य असा छत्रपती शिवाजी महाराजांचा अश्वारूढ पुतळा, चौथऱ्याभोवती ठेवलेल्या तोफांच्या प्रतिकृती, मावळ्यांची व इतर गजशिल्पे तसेच मोकळ्या जागेत केलेली सुंदर रचना, रस्त्यावर केलेली आकर्षकता यामुळे हे शिवतीर्थ मराठी चित्रपटांच्या निर्मात्यांच्या व कलाकारांच्या पसंतीस उतरत आहे.

शैक्षणिक जीवनावर आधारित असलेल्या या चित्रपटात भारत गणेशपुरे, आनंद जोग यांच्यासह मराठी मालिकांमधील दहा नायिका भूमिका साकारत आहेत.

दहावी-बारावीनंतर मुलांना महागडे क्लासेस लावावे लागतात. या पार्श्वभूमीवर मोठ्या हुद्द्यावर असलेल्या माजी विद्यार्थ्यांच्या मदतीने गरीब व गरजू विद्यार्थ्यांसाठी दत्तक योजना राबवण्याचा एक प्रेरक संदेश या चित्रपटातून दिला जाणार आहे.

गीतकार मोमीन कवठेकर व दीपक गायकवाड यांच्या ‘मराठमोळा रे कणखर काळा रे- शिवबांचा हाय ह्यो मावळा मावळा’ याही गाण्याचे चित्रीकरण या वेळी झाले.

एसकेडी इंटरनॅशनल स्कूल, डॉ. डी. एस. आहेर पब्लिक स्कूल तसेच किशोरसागर धरणाच्या परिसरातही चित्रीकरण होणार आहे. देवळा शहर व तालुक्यात प्रथमच असे चित्रीकरण होत असल्याने तो औत्सुक्याचा विषय ठरला आहे. अनेकांनी कलाकारांसमवेत सेल्फी, फोटो घेतले.

"देवळा शहराचा परिसर, शिवस्मारक व त्याभोवतीचे वातावरण या साऱ्याच गोष्टी चित्रपटासाठी अनुकूल वाटल्याने आम्ही हे लोकेशन निवडले. लातूर, तुळजापूर, शिर्डी आणि आता देवळा या ठिकाणी या चित्रपटाचे चित्रीकरण झाले असून, लवकरच हा चित्रपट प्रदर्शित केला जाणार आहे."-संजय पाटील, निर्माता