नाशिक : शहरातील सातपूर, पंचवटी, नाशिक रोड, पश्‍चिम व पूर्व विभागाप्रमाणेच सिडकोतील घरांची पुनर्बांधणी करताना जिना, पॅसेज, टप्प्याच्या प्रीमियम शुल्क माफ करण्याच्या निर्णयाला स्थायी समितीने मंजुरी दिली आहे. याचा फायदा सिडकोतील सर्वच म्हणजे २५ हजार घरांना होणार असून, प्रत्येकी किमान एक लाख रुपयांची बचत होणार आहे. सिडकोतील घरांच्या परवानगीचे अधिकार महापालिकेकडे हस्तांतरित करण्यासाठी शासनाकडे प्रस्ताव सादर केला जाणार आहे. 

भाजपची एकहाती सत्ता असल्यानेच हे शक्य

सिडकोच्या सहा स्कीम महापालिकेकडे वर्ग करण्यात आल्या असल्या तरी घरांची पुनर्बांधणी करताना जिना, पॅसेज, जिन्याच्या टप्प्यासाठी महापालिकला प्रीमियमशुल्क अदा करावे लागते. परंतु सातपूर, पंचवटी, नाशिक रोड, पश्‍चिम व पूर्व विभागात असे कुठलेच शुल्क आकारले जात नसल्याने दुजाभाव निर्माण होत असल्याने प्रीमियम शुल्कमाफीचा प्रस्ताव सादर करण्यात आला होता. स्थायी समितीने नांदेड व औरंगाबादच्या धर्तीवर प्रीमियमशुल्क माफीचा निर्णय घेतला. पुनर्बांधणीशुल्क माफ केल्याने स्थायी समिती सभापती गणेश गिते यांचे आमदार सीमा हिरे यांनी अभिनंदन केले. महापालिकेत भाजपची एकहाती सत्ता असल्यानेच हे शक्य झाल्याचा दावा त्यांनी केला. 

हेही वाचा > नाशिकच्या गुलाबी थंडीत हॅलिकॉप्टरने अचानक आमीर खानची एंट्री होते तेव्हा..!..

सिडकोच्या परवानग्या महापालिकेकडे 

सिडकोतील घरांची पुनर्बांधणी करताना सिडकोसह महापालिका प्राधिकरणाकडे अर्ज सादर करावा लागतो. सर्व योजना महापालिकेकडे हस्तांतरित झाल्याने दोन प्राधिकरणांची गरज नाही. सर्व परवानगी महापालिकेमार्फतच मिळाल्या पाहिजे, अशी मागणी नगरसेवक सुधाकर बडगुजर यांनी केली. त्यासाठी शासनाकडे प्रस्ताव सादर करण्याच्या सूचना स्थायी समिती सभापती गणेश गिते यांनी दिल्या.  

हेही वाचा > जिल्हाधिकारी चक्क कार्यालय सोडून 'जोडप्याला' भेटतात तेव्हा..!...