Nashik Bribe Crime : जमीन मोजायची आहे, मग तीन हजार रुपये द्या, अशी पैशांची मागणी करणारा येथील भूमिअभिलेख कार्यालयातील मुख्यालय सहाय्यक अंजीनाथ बाबूराव रसाळ यास शुक्रवारी (ता. १) लाचलुचपत प्रतिबंधक विभागाच्या पथकाने एक हजार ५०० रुपयांची लाच घेताना रंगेहाथ पकडले. (HQ assistant arrested while taking bribe nashik crime news)

तक्रारदार शेतकऱ्याची वडिलोपार्जित शेती असून, या शेतजमिनीची मोजणी करण्यासाठी रसाळ याने शेतकऱ्याकडे तीन हजार रुपयांची लाच मागितली होती. त्या मागणीच्या तडजोडीअंती एक हजार ५०० रुपये देण्याचे ठरले. त्यानंतर शेतकऱ्याने नाशिक येथील लाचलुचपत प्रतिबंधक विभागाकडे तक्रार दाखल केली होती.

या विभागाच्या पथकाने सापळा रचून शुक्रवारी रसाळ यास एक हजार ५०० रुपयांची लाच घेताना रंगेहाथ पकडले. चांदवड पोलिस ठाण्यात गुन्हा नोंदविण्याचे काम सुरू होते. पोलिस निरीक्षक परशुराम कांबळे, हवालदार प्रफुल्ल माळी, सचिन गोसावी यांनी ही कारवाई केली.