नाशिक : निर्वासित अफगाणी सुफी धर्मगुरू जरीफबाबा यांच्या खून प्रकरणातील मुख्य संशयित व त्यांच्या जुन्या वाहनचालकासह तिघांना मुंबईतील बदलापूरमधून नाशिक ग्रामीण पोलिसांनी अटक केली आहे. ही माहिती पोलिस अधीक्षक सचिन पाटील यांनी दिली. रवींद्र तोरे (रा. कोळपेवाडी, ता. कोपरगाव, जि. अहमदनगर) असे या वाहनचालकाचे नाव आहे. (Latest Marathi News)

ख्वाजा सय्यद जरीफ अहमद चिश्ती उर्फ जरीफबाबा (वय २८) असे या निर्वासित अफगाण धर्मगुरूंचे नाव आहे. जरीफबाबा हे पत्नी तरिनासह वावी परिसरात राहात होते. येवला शहर पोलिस ठाण्यात जरीफबाबा यांचा वाहनचालक अफजल अहमद कुर्बान खान (वय ३४, रा. मिरगाव, सिन्नर) याने फिर्याद दिली आहे. त्यानुसार मंगळवारी (ता. ५) जरीफबाबासह ते चारचाकी वाहनाने (एमएच ४३, बीयू ७८८६) वावीहून येवला येथे धार्मिक विधीसाठी गेले होते. सायंकाळी त्यांचा जुना वाहनचालक रवींद्र तोरे याने चिचोंडी औद्योगिक वसाहत परिसरात जमिनीची पूजा करण्यासाठी बोलावले होते. पूजाविधी आटोपल्यानंतर संशयितांनी त्यांच्यावर गोळी झाडून खून केला. तेव्हापासून संशयित पसार होता.

संशयितांना पकडण्यासाठी नाशिक ग्रामीणचे पोलिस त्यांच्या मागावर होते. संशयित मुंबई परिसरात असल्याची माहिती मिळाली असता, पोलिसांनी बदलापूर परिसरातून मुख्य संशयित रवींद्र तोरे याच्यासह तिघांना अटक केली. मुख्य संशयिताला अटक झाल्याने या खुनाचा उलगडा पोलिस चौकशीतून होणार आहे.