नाशिक : महाराष्ट्र नवनिर्माण सेनेत (MNS) प्रवेश करून चांगलं पद देतो, असं सांगून पंधरा हजाराची मागणी केल्यामुळं तीन संशयितांनी प्रवीण दिवेकर या तरुणाचा खून केल्याचं निष्पन्न झालंय.

दरम्यान, गुन्हे शाखा युनिट एकच्या (Crime Branch Unit) पथकानं संशयितांना अटक केली आहे. या प्रकरणात संशयित तुषार पवार, चेतन देहाडे आणि एक अल्पवयीन बालकाचा समावेश आहे. प्रवीण दिवेकर याचा गळा चिरून खून करण्यात आला होता. जेलरोड इथं हा प्रकार घडला होता.

घरात पार्टी करत असताना दिवेकर यानं मनसेमध्ये प्रवेश देण्यासाठी पंधरा हजारांची मागणी केली. याला संशयित तुषार पवार यांनी नकार दिला. त्यामुळं दोघांमध्ये मोठा वाद झाला. त्यानंतर पवार व त्याच्या मित्राच्या मदतीनं दिवेकरचा खून केला.

गुन्हे शाखा युनिट एकच्या पथकानं परिसरातील सीसीटीव्हीच्या आधारे माहिती काढून संशयितांचा माघ काढला आणि कसून चौकशी केली असता, त्यांनी गुन्ह्याची कबुली दिली, अशी माहिती पोलिस उपायुक्त प्रशांत बच्छाव यांनी दिली.