नाशिक : महाविद्यालयातील ओळखीतून जुळलेल्या प्रेमाचा फायदा घेत गोविंदनगर परिसरातील संशयिताने पालकांसोबत ओळख करुन देण्याचा बहाणा करून घरी नेले आणि बळजबरीने बलात्कार केला. तसेच, त्यानंतरही वारंवार गावठी कट्ट्याचा धाक दाखवून वेगवेगळ्या ठिकाणी नेऊन पीडितावर लैंगिक अत्याचार केल्याची धक्कादायक घटना समोर आली.

विशेषत: संशयिताने पीडितेला एमडी ड्रग व गावठी कट्टे जवळ बाळण्यास सांगितले असता, तिने नकार देताच तिला जातीवाचक शिवीगाळ करुन धमकवले. त्याप्रकरणी अंबड पोलिसात संशयिताविरोधात बलात्कार, आर्म अँक्ट, अॅट्रॉसिटीअन्वये गुन्हा दाखल करण्यात आला आहे.

सनी अरुण निहाळदे (28, रा. पवननगर, सिडको, हल्ली रा. गोविंदनगर) असे संशयिताच नाव आहे. २६ वर्षीय पीडितेच्या फिर्यादीनुसार, ती पंचवटीतील एका महाविद्यालयात असताना तिची ओळख निहाळदेशी झाली. त्याने सन 2018 पासून 20 आॅक्टाेबर 2022 पर्यंत तिला स्वत:च्या पालकांबरोबर तिची ओळख करून देतो असे सांगून पवननगर येथील घरी बोलावुन घेतले.

तेथे त्याने घरी कुणीही नसल्याची संधी साधत लैंगिक अत्याचार केला. हे जर कुणाला सांगितले तर तुला व घरातील लोकांना ठार मारील अशी धमकी दिली. यासह याच कालावधीत स्कॉडा कारमध्ये (एमएच 48 पी 1536) बसवून पाथर्डी फाटा येथील सेवन हेवन हॉटेल, हॉटेल पंचवटी एक्सप्रेस, हॉटेल एक्सिलेन्सी येथे नेत अत्याचार केले.

दरम्यान, सनी याने आपल्याकडील दोन पैकी एक गावठी कट्टा व एमडी ड्रग तुझ्या घरी ठेव, जेव्हा लागेल मला तेव्हा दे, असे म्हणत तिला धमकावले. तिने कट्टे जवळ ठेवण्यास नकार देताच त्याचा राग आल्याने सनीने तिला लाथाबुक्यांनी मारहाण केली व जातीवाचक शिवीगाळ केली.

तसेच, पीडितेला फोनवरुन धमकावत त्याने अश्लिल बोलून महापुरुषांचा अवमान केल्याचा व्हिडीआदेखिल पोलिसांना सादर करण्यात आला आहे. याबाबत सहायक आयुक्त सोहेल शेख तपास करीत आहेत.