शिरपूर : दीर्घकाळ बंद असलेला रेफ्रिजरेटर सुरू केल्यानंतर त्याचा कॉम्प्रेसर फुटून लागलेल्या आगीत लाखो रुपयांचे साहित्य जळून खाक झाले. ही घटना 23 मार्चला सायंकाळी सातला शहरातील गणेश कॉलनीत घडली. शोभा धर्मराज शिरसाट असे घरमालकिणीचे नाव असून त्या सुरत येथे मुलाकडे राहतात. त्यांची सर्व मुले बाहेरगावी स्थायिक असून त्यांचे साहित्य तीन खोल्यात ठेवले होते. काही दिवसांपूर्वी त्यांचा नातू ओम शिरसाट शिरपुरात शिक्षणासाठी आला असून तो आजीच्या घरात राहतो. वर्षभरापासून वापरात नसलेला रेफ्रिजरेटर त्याने काही दिवसांपूर्वी उन्हाळ्यात थंड पाण्यासाठी सुरू केला.

23 मार्चला सायंकाळी तो घराच्या छतावर असताना रेफ्रिजरेटरच्या कॉम्प्रेसरचा जोरदार स्फोट होऊन आग लागली. त्यात लाकडी कपाट, पलंग, गाद्या, किचन सेट, धान्य, इलेक्ट्रिक पॅनल, छताचे पंखे, लाकडी मंदीर आदी साहित्य जळून खाक झाले. लोखंडी कपाटातील महत्वाची कागदपत्रे, मुदत ठेव प्रमाणपत्रे, ओम शिरसाटचे महाविद्यालयीन किटही आगीच्या भक्ष्यस्थानी पडले. स्थानिक नगरसेविका संगीता देवरे यांनी सूचित केल्यानंतर पालिकेचे बंब घटनास्थळी पोहचले. त्यांनी तासभर पाण्याचा मारा करून आग आटोक्यात आणली. या आगीत तीन ते चार लाख रुपयांचे नुकसान झाल्याची भीती शिरसाट कुटुंबीयांनी व्यक्त केली.