Sambhajiraje Chhatrapati : छत्रपती शिवाजी महाराज, महात्‍मा फुले, राजर्षी शाहू महाराज, डॉ. बाबासाहेब आंबेडकर अशा थोर पुरुषांसह महाराष्ट्राला मोठी संतपरंपरा असताना छत्रपती शिवाजी महाराजांचा त्रास देणाऱ्या व संभाजी राजांची हत्‍या केलेल्‍या औरंगजेबाचे उदात्तीकरण अशोभनीय आहे.

जे लोक औरंगजेबाचे उदात्तीकरण करत आहेत, त्‍यांना महाराष्ट्रात राहण्याचा अधिकार नाही, अशा शब्‍दात स्‍वराज्‍य पक्षाचे प्रमुख माजी खासदार संभाजीराजे छत्रपती यांनी खडसावले. (Sambhajiraje Chhatrapati statement about maharashtra politics nashik news)

नाशिक दौऱ्यावर असलेल्‍या संभाजीराजे छत्रपती यांनी गंगापूर रोडवरील रावसाहेब थोरात सभागृह येथील कार्यक्रमानंतर माध्यम प्रतिनिधींशी संवाद साधला. सध्या राज्‍यातील राजकारणाची पातळी खालावली असल्‍याची टीका त्‍यांनी केली. ते म्‍हणाले, की महाडला जात असताना डॉ. बाबासाहेब आंबेडकरांनी रायगडावर जाऊन छत्रपती शिवाजी महाराजांच्‍या समाधीला वंदन केले.

आज छत्रपती शिवाजी महाराज, महात्‍मा फुले, राजर्षी शाहू महाराज, डॉ. बाबासाहेब आंबेडकर यांच्‍या विचारांची समाजाला खरी गरज आहे. परंतु या थोर पुरुषांचे आचार-विचार दुर्लक्षित झाल्याची खंत वाटते.

हेही वाचा : Credit Card फसवणूक....काय घ्याल काळजी?

छत्रपती शिवाजी महाराजांना ज्‍यांनी त्रास दिला, संभाजी महाराजांची ज्‍याने हत्या केली, महाराणी ताराराणी यांना ज्‍याच्‍याविरोधात संघर्ष करावा लागला, अशा औरंगजेबाचे उदात्तीकरण महाराष्ट्रातील भूमीत तरी व्‍हायला नको. जर ते होत असेल, तर हा आपला महाराष्ट्र असूच शकत नाही, अशी टीकाही त्‍यांनी केली.

‘वेल ॲन्ड गुड’

भावी मुख्यमंत्री म्‍हणून आपले नाव व छायाचित्र असलेले फलक लावण्यात आल्‍याबाबत विचारले असता संभाजीराजे छत्रपती म्‍हणाले, की कार्यकर्त्यांनी हे फलक लावले आहेत. याबाबत माझ्या मनात काहीही नसून, केवळ काम करत राहायचे आहे. कार्यकर्ते या कामासाठी ताकद देत असतात. भावी मुख्यमंत्री म्‍हणवत माध्यमांकडूनही महत्त्व दिले जात आहे. याबाबत ‘वेल ॲन्ड गुड’ असे म्‍हणत ते पुढील कार्यक्रमासाठी रवाना झाले.