सोग्रस : खडकजांब (ता. चांदवड) येथे शनिवारी (ता.२८) दुपारी तीनला दुचाकीवरून आलेल्या चोरट्याने पायी जात असलेल्या महिलेच्या गळ्यातून सोन्याची पोत ओरबाडून नेली. पोत ओरबाडल्यानंतर चोरट्याने महिलेस धक्का देत नाल्यात ढकलले.

यामुळे महिला गंभीर जखमी झाली. खडकजांब येथे राहणाऱ्या मिराबाई गुंजाळ या दुपारी महामार्गावरुन वस्तीकडे पायी जात असताना दुचाकीवरून आलेल्या चोरट्याने माझी गाय हरविली असून मोरेंचा मळा कुठे आहे ? असे विचारले.

त्यानंतर मिराबाई गुंजाळ यांनी त्यास पत्ता सांगत पुढे निघून गेल्या. यावर दुचाकीस्वाराने त्यांच्या मागून जात त्यांच्या गळ्यातील सोन्याची पोत ओरबाडत त्यांना नाल्यात ढकलून दिले. याप्रकरणी वडनेर भैरव पोलिस ठाण्यात गुन्हा दाखल करण्यात आला.