नाशिक : बाजार समितीत स्थानिक ठिकाणहून आवक झालेला मोठ्या प्रमाणावरील भाजीपाला व त्या तुलनेत घटलेली मागणीमुळे बुधवारच्या आठवडे बाजारात सर्वच भाज्या २० ते ३० रुपये किलो दराने उपलब्ध होत्या. गावठी गवार व चंपाषष्ठीच्या पार्श्‍वभूमीवर बाजारात दाखल झालेली भरताची वांगी मात्र भाव खाऊन गेले. (Vegetables downfall in weekly market Nashik news)

दीपावलीनंतर खवय्यांचा ओढा नॉनव्हेजकडे वाढला असून तो अद्यापही बऱ्यापैकी टिकून आहे. त्यातच थंडीचा कडाका सुरू झाल्याने सर्वच प्रकारच्या भाजीपाल्याची मोठ्या प्रमाणावर आवक झाली आहे. मात्र, पुरवठ्याच्या तुलनेत मागणी घटल्याने मेथी, कोथिंबीर, पालक या पालेभाज्यांचे दर मोठ्या प्रमाणावर घसरले. मेथी, कोथिंबीर, पालकाची जुडी अवघ्या पंधरा ते वीस रूपयांत उपलब्ध होती. याशिवाय गिलके, कारली, दोडका, भोपळाही वीस ते तीस रुपये किलोने उपलब्ध होता, भाज्यांना भाव नसल्याने अनेकांनी रात्री उशिरापर्यंत थांबून भाज्यांची विक्री करणे पसंत केले.

येत्या २९ नोव्हेंबरला चंपाषष्ठी आहे. या दिवशी राज्याचे कुलदैवत असलेल्या खंडोबाला भरत भाकरीचा नैवेद्य दाखविला जातो. मात्र, चंपाषष्ठीपूर्वीच बाजारात भरताची वांगी विक्रीसाठी आली आहे. बाजारात इतर भाज्यांना मागणी व भाव नसला तरी भरताची वांगी वीस रुपये पावशेर म्हणजे ऐंशी रुपये किलोने तर गावठी गवार शंभर ते एकशेवीस रुपये किलो दराने उपलब्ध होता.