धुळे : शहरातील चाळीसगाव रोड चौफुलीवर पाच वर्षांपूर्वी इंदूरच्या प्रवाशाला लुटणाऱ्या गुन्हेगार वसीम वड्याला न्यायालयाने एक वर्ष सश्रम कारावास आणि हजार रुपये दंडाची शिक्षा ठोठावली. विशेष म्हणजे चाळीसगाव रोड पोलिसांनी या गुन्ह्यातील मुद्देमाल शंभर टक्के रिकव्हर केला. जलदगती तपास करीत चार दिवसांत दोषारोपपत्रही जिल्हा न्यायालयात दाखल केले होते. (Rigorous imprisonment to Salim Vada for robbing passengers 2 lakh worth goods seized Dhule Crime Latest Marathi News)

इंदूर येथील शब्बीर हुसेन हैदर अली कप्तान यांना १८ मार्च २०१८ ला मध्यरात्री चाळीसगाव रोड चौफुलीवर वसीम सलीम रंगारी ऊर्फ वसीम वड्या (रा शब्बीर नगर, दोन हजार प्लॉट, धुळे) याने लुटले. त्यांच्याकडील ब्रेसलेट, सोन्याच्या बांगड्या, अंगठ्या, इयरिंग, गोल्ड कॉइन, लेडीज मनगटी घड्याळ व आयटीएस स्मार्ट कार्ड, असा एकूण एक लाख ९७ हजार किमतीचा मुद्देमाल लुटून नेला.

या प्रकरणी चाळीसगाव रोड पोलिस ठाण्यात गुन्हा दाखल झाला. उपनिरीक्षक सागर आहेर यांनी तपास चक्र फिरवत हवालदार प्रेमराज पाटील, जोएब पठाण, सुशील शेंडे व सोमनाथ चौरे आदींनी काही तासातच आरोपी निष्पन्न करीत गुन्ह्याचा छडा लावला. वसीम वड्या यास ताब्यात घेत गुन्ह्यातील शंभर टक्के मुद्देमाल रिकव्हर केला.

न्यायालयाने साक्षीदारांची साक्ष आणि सरकारी वकील राकेश चौधरी यांचा युक्तिवाद ग्राह्य मानून आरोपी वसीम वड्या यास एक वर्ष सश्रम कारावास आणि हजार रुपये दंड, तो न भरल्यास दोन महिने साधा कारावास, अशी शिक्षा सुनावली.