नाशिक : महाराष्ट्र राज्य रोजंदारी वर्ग-3, वर्ग-4 कर्मचारी संघर्ष संघटनेतर्फे प्रलंबित मागण्यांसाठी पुन्हा एकदा बिऱ्हाड आंदोलन छेडण्यात आले. आंदोलनकर्त्यांनी आत्मदहनाचा इशारा दिलेला असल्याने सकाळपासून जुना आग्रा महामार्गावरील आदिवासी विकास भवन परीसरात पोलिस बंदोबस्त ठेवण्यात आला होता. मात्र दुपारी दीडच्या सुमारास त्र्यंबकरोडवरील ईदगाह मैदान परीसरात आंदोलनकर्त्यांनी ठिय्या ठरत आंदोलन केले.
आंदोलनाच्या पार्श्‍वभुमिवर आदिवासी विकास भवन परीसरात सकाळपासून पोलिसांचा मोठा फौजफाटा तैणात केलेला होता. कार्यालयात येणाऱ्या व्यक्‍तींची चौकशी करून आत सोडले जात होते. या दरम्यान आंदोलनासाठी आलेल्या काही आंदोलनकर्त्यांना पोलिसांनी ताब्यातदेखील घेतले. दुपारी दीडच्या सुमारास त्र्यंबकरोडवरील ईदगाह मैदानाच्या प्रवेशद्वाराजवळ सर्व आंदोलक एकवटले. मैदानात नेण्यासाठी पोलिसांनी आंदोलनकर्त्यांची मनधरणी केली परंतु, त्यांना यश आले नाही. अखेर आंदोलनकर्त्यांनी रस्त्यावर ठाण मांडत चर्चेची मागणी करतांना तात्काळ निर्णय घेण्याची भुमिका घेतली. पोलिसांच्या मध्यस्थीनंतर आदिवासी विकास विभागाचे उपायुक्‍त प्रदीप पोळ यांना आंदोलनस्थळी पाचारण करण्यात आले. यावेळी रितेश ठाकूर यांनी आपल्या मागण्यांविषयी सविस्तर माहिती दिली. यासंदर्भात आयुक्‍तांशी चर्चा करुन त्यानंतर ठोस निर्णय घेणार असल्याचे श्री. पोळ यांनी सांगितले. पदयात्रा काढत आदिवासी विकास भवनला जाण्याची मागणी आंदोलनकर्त्यांनी केली. मात्र वाहतुकीला अडथळा ठरणार असल्याचे कारण देत पोलिसांनी परवानगी दिली नाही. अखेर आंदोलनकर्त्यांपैकी काहींना वाहनातून आदिवासी विकास भवनला नेण्यात आले.

अशा आहेत मागण्या:
ज्यांचा अनुभव पदवीधर प्राथमिक व प्राथमिक शिक्षक असून त्यांना अनुभव गुदान करावे. व तोपर्यंत निवड प्रक्रियेला स्थगिती द्यावी. प्राथथमकची प्रतिक्षा यादी जाहिर करावी. महिला अधिक्षकांच्या भरती प्रक्रियेत रोजंदारी महिला अधिक्षिकांना त्यांचा समायोजन होतांना दिसत नसल्याने भरती तात्काळ स्थगित करावी. मध्यवर्ती भोजनगृह सुरू केल्यामुळे दहा ते पंधरा वर्षे काम करणाऱ्या वर्ग 4 कर्मचाऱ्यांना कामावरुन कमी केले असून त्यांना पुन्हा कामावर घेऊन कायम सेवेत समायोजन करावे. जुन्या अनुभवी रोजंदारी कर्मचाऱ्यांना डावलून सुरू केलेली नवीन रोजंदारी भरती प्रक्रिया तातडीने थांबवावी.