नाशिक : महिलेच्या पर्समधून एटीएम कार्ड चोरून त्यावरून ऑनलाइन खरेदी करीत, सुमारे दीड लाख रुपयांना गंडविल्याप्रकरणी सायबर पोलिसानी संशयित महिलेला अटक केली आहे. याप्रकरणी सायबर पोलिसात गुन्हा दाखल आहे. 

शाकेरा अब्दुल शेख (33, रा. गोरेवाडी, नाशिकरोड) असे अटक केलेल्या महिलेचे नाव आहे. ज्योती दीपक शिंदे (रा. कैलास नगर, पंचवटी) यांच्या फिर्यादीनुसार, गेल्या महिन्यात त्यांच्या पर्समधून अज्ञात चोरट्याने एटीएम कार्ड चोरी केले होते. त्यानंतर संशयिताने त्या कार्डचा वापर करीत, ऑनलाइन पद्धतीने 16 ते 21 सप्टेंबर दरम्यान, दीड लाख रुपयांची खरेदी केली होती. सदरचा प्रकार लक्षात आल्यानंतर ज्योती शिंदे यांनी गेल्या 30 सप्टेंबरला सायबर पोलीस ठाण्यात धाव घेत चोरीसह फसवणूकीची फिर्याद दिली. 
याप्रकरणी वरिष्ठ पोलीस निरीक्षक देवराज बोरसे यांच्या पथकाने तपास सुरु केला. चोरट्याने 16 ते 21 सप्टेंबर दरम्यान चोरीचे एटीएम कार्ड वापरून ऑनलाइन खरेदी केली होती. त्यानुसार पोलिसांनी सर्व व्यवहार तपासत, तांत्रिक माहितीच्या आधारे संशयित महिला शाकेरा शेख हिला अटक केली. शाकेरा हिने खरेदी केलेली 15 हजार रुपयांची सोन्याची चैनही पोलिसांनी जप्त केली आहे. न्यायालयाने शाकेरा हिस पोलीस कोठडी सुनावली. वरिष्ठ पोलीस निरीक्षक देवराज बोरसे, पोलीस हवालदार किरण जाधव, पोलीस नाईक संतोष काळे, पोलीस शिपाई दीपाली नेटके, शामल जोशी यांच्या पथकाने ही कामगिरी केली.