नागपूर : राज्य माध्यमिक व उच्च माध्यमिक शिक्षण मंडळाद्वारे घेण्यात आलेल्या बारावीच्या मुख्य परीक्षेच्या निकालात शेवटून पहिला क्रमांक मिळविणाऱ्या नागपूर मंडळाचे स्थान फेरपरीक्षेत सुधारले आहे. शुक्रवारी मंडळाकडून जाहीर करण्यात आलेल्या बारावीच्या निकालात 28.32 टक्के निकाल देत, विभागाने राज्यात दुसरे स्थान पटकाविले आहे. पहिले स्थान 33.89 टक्‍क्‍यासह लातून विभागीय शिक्षण मंडळाने पटकाविले आहे.
बारावीच्या विद्यार्थ्यांचे वर्ष वाया जाऊ नये यासाठी 17 ते 31 जुलैदरम्यान परीक्षा घेण्यात आली होती. परीक्षेत 16 हजार 772 विद्यार्थ्यांनी नोंदणी केली. यापैकी 16 हजार 756 विद्यार्थी परीक्षेत बसले. त्यापैकी 4 हजार 745 विद्यार्थी उत्तीर्ण झालेत. विज्ञान शाखेतून सर्वाधिक 32.73 टक्के विद्यार्थी उत्तीर्ण झाले असून सर्वात कमी 25.10 टक्के विद्यार्थी एमसीव्हीसी शाखेतून उत्तीर्ण झाले आहेत. विभागातून भंडारा जिल्ह्याचा निकाल सर्वाधिक 46.77 टक्के तर नागपूर जिल्ह्याचा निकाल सर्वात कमी 21.39 टक्के लागला आहे. गेल्या वर्षी विभागाचा फेरपरीक्षेचा निकाल 25.51 टक्के लागला होता. यावर्षी त्यामध्ये 2.81 टक्के वाढ झाली आहे. विशेष म्हणजे उन्हाळी परीक्षेत निकाल 5.06 टक्‍क्‍यांनी घटला होता.

पहिले तीन विभाग
लातूर - 33.81
नागपूर - 28.32
औरंगाबाद - 28.16