नागपूर (देवलापार) : येथून नजीकच असलेल्या मानसिंगदेव अभयारण्यात वाघाच्या एका वर्षाच्या बछड्याचा मृत्यू झाल्याची घटना गुरुवारी सकाळी सहादरम्यान उघडकीस आली. त्या बछड्याचे अक्षरशः चार ते पाच तुकडे आढळल्याने विविध शंका उपस्थित केल्या जात आहेत. देवलापार मानसिंगदेव अभयारण्य आहे. येथून बारा किलोमीटर अंतरावर खुर्सापार प्रवेशद्वार आहे. गुरुवारी सकाळी देवलापार मानसिंगदेव अभयारण्याचे वनपरिक्षेत्र अधिकारी प्रवीण साठवणे व क्षेत्रसहायक जीवन पवार हे सकाळी गस्तीवर असताना त्यांना दुर्गंधी आल्याने त्यांनी परिसराची पाहणी केली. त्यांना वाघाच्या बछड्याचा पाय दिसून आला. दुसरीकडे त्याचे धड, काही दूर अंतरावर मान व जबडा तर एका ठिकाणी त्याच्या शरिराचा अर्धवट भाग आढळला. तुकडे तुकडे झाल्याने त्याचा मृत्यू संशयास्पद असल्याची चर्चा आहे.
अवनीचा बछडा?
मृत बछड्याचे अवयव साबूत असल्याचे वनपरिक्षेत्र अधिकारी साठवणे सांगतात. मोठ्या वाघाने त्याच्या परिसरात आल्यामुळे बछड्याला मारले असावे असे सांगून याबाबतची माहिती साठवणे यांनी वनसंरक्षक गोवेकर यांना सकाळी सातला दिल्याचे सांगितले. परंतु, गोवेकर चार वाजता गेटवर पोहोचले व त्यांनी स्थानिक वर्तमानपत्राच्या प्रतिनिधींना घटनास्थळावर येऊ दिले नाही. त्याचप्रमाणे पाच वाजूनही उत्तरीय तपासणीकरिता डॉक्‍टर पोहोचले नसल्याने पुढील कार्यवाही थांबली. उत्तरीय तपासणी होणार की नाही, याबाबत माहिती देण्याचे त्यांनी टाळले. दरम्यान, मृत बछडा अवनीचा असल्याची चर्चा आहे.