उमरेड(जि.नागपूर) : यंदाच्या पावसाळी हंगामात पावसाने दमदार हजेरी लावून शेतकऱ्यांची चांगलीच कोंडी केली. जुलै ते ऑक्‍टोबरदरम्यान उमरेड तालुक्‍यात सरासरी 1099.33 मिमी पावसाची नोंद करण्यात आली. त्यानंतर दिवाळीच्या धामधुमीत परतीच्या पावसाने झोडपून काढले. त्यामुळे धानाचे मोठ्या प्रमाणात नुकसान झाल्याचे चित्र सर्वत्र दिसून येत आहे. ओला दुष्काळ जाहीर करण्यात यावा, अन्यथा राज्यव्यापी आंदोलन करण्याचा इशारा माजी मंत्री राजेंद्र मुळक यांनी दिला. 
दिवाळीच्या पूर्वसंध्येला मुसळधार पाऊस पडला. या दिवशी 16.11 मिमी नोंद करण्यात आली. या परतीच्या पावसामुळे तालुक्‍यातील शेतकऱ्यांवर दुष्काळाचे सावट दिसू लागलेत. नुकतीच झालेली विधानसभा निवडणूक आणि त्यानंतर लगेच सुरू झालेल्या दिवाळीमुळे कृषी विभागासोबतच महसूल विभागाचे कामकाज बंद असल्यामुळे शेतकऱ्यांची गैरसोय झाली. तालुका कृषी अधिकारी संजय वाकडे यांनी 25 ते 27 ऑक्‍टोबरदरम्यान झालेल्या अतिवृष्टीमुळे शेतमाल नुकसानीचा प्राथमिक अहवाल देऊन माहिती पुरविली. धानाचे पीक एकूण 74 गावांमध्ये एकूण 170 हेक्‍टर क्षेत्रात पावसामुळे नुकसान झाले. त्यापैकी 140 हेक्‍टरमध्ये 33टक्‍क्‍यांच्या आत नुकसान झाले. 30 हेक्‍टरांतील धान पिकाचे 33 टक्‍केपेक्षा अधिक नुकसान झाले, असल्याची माहिती कृषी अधिकाऱ्यांनी दिली. धानाची एकूण लागवड 1708 हेक्‍टर क्षेत्रात केली असून कापूस-23169 तर सोयाबीन-14546 हेक्‍टर क्षेत्रात घेतले असून सोयाबीन व कापसाचे नुकसान निरांक दर्शविले आहे. प्रत्यक्ष पंचनामे लवकरच सुरू केले जातील, असे तालुका कृषी अधिकारी म्हणाले. 
जिल्ह्यात परतीच्या पावसामुळे शेतकऱ्यांच्या मालाची हानी भरून काढण्यासाठी ओला दुष्काळ जाहीर करावा अशा विनंतीचे निवेदन राज्यपालांना सादर करण्यात येईल. त्या मंडळात बाळासाहेब थोरात, पृथ्वीराज चव्हाण, अशोक चव्हाण हजर राहतील. याशिवाय राज्यातील सर्व नवनियुक्त आमदार हजर राहतील. त्यानंतर शासनाच्या वतीने मागण्या मान्य केल्या गेल्या नाहीत तर मग आम्ही राज्यव्यापी आंदोलन करू. 
राजेंद्र मुळक 
माजी मंत्री, अध्यक्ष, नागपूर ग्रामीण कॉंग्रेस कमिटी