नागपूर : सहा वर्षांच्या सुखी संसारानंतर संशयाच्या भूताने पछाडले अन् एका सुखी संसाराला जणू ग्रहणच लागले. सततच्या संशयावरून पती-पत्नीमध्ये ताणतणाव वाढत गेला. अखेर प्रेमविवाहाचा करूण अंत झाला. ही घटना बेलतरोडीत परिसरात उघडकीस आली.  

आनंद चौरे आणि सारिका चौरे (वय 28, रा. महाकालीनगर झोपडपट्‌टी) हे दोघेही लग्नापूर्वी एकमेकांचे शेजारी होते. त्यांच्या ओळखीचे रूपांतर प्रेमात झाले. दोघेही एकमेकांच्या प्रेमात पडले. दोघांनीही आईवडिलांना सांगून गेल्या सहा वर्षांपूर्वी प्रेमविवाह केला. त्यांच्या सुखी संसारावर दोन फुले उमलली. मोठा मुलगा पाच वर्षांचा तर लहान तीन वर्षाचा आहे. मात्र, गेल्या दोन महिन्यांपासून दोघांत खटके उडायला लागले होती. दोघांच्या नात्यामध्ये संशयाने प्रवेश केला. पती आनंद हा बांधकामावर मजूर म्हणून कामाला होता तर सारिका ही गृहिणी होती. दोन्ही मुलांचा सांभाळ करणे तसेच वेळ पडल्यास पतीसह कामालाही जात होती. गेल्या महिन्याभरापासून घरात धुसफूस सुरू होती. मात्र, त्याबाबत आईवडीलांना माहिती होऊ दिली नव्हती. सर्व काही आलबेल असल्याचे त्यांच्याकडून दर्शविण्यात येत होते.

अवश्य वाचा - ब्रेकिंग...मुंबईवरून आलेल्या कोरोनाग्रस्ताचा यवतमाळात मृत्यू

प्रेमविवाहाचा करूण अंत

23 मे रोजी रात्री आठ वाजताच्या सुमारास पती-पत्नीत पुन्हा वाद झाला. दोघांनीही एकमेकांवर आगपाखड केली. रात्री दहा वाजता आनंदने दोन्ही मुलांसह जेवण केले आणि फेरफटका मारण्यासाठी मुलांना घेऊन निघून गेला. अर्ध्या तासात तो परतला असता सारिका ही ओढणीने गळफास घेतलेल्या अवस्थेत दिसून आली. त्याने लगेच धाव घेत ब्लेडने ओढणी कापली. बेशुद्धावस्थेत असलेल्या सारिकाला तातडीने मेडिकल हॉस्पिटलमध्ये दाखल करण्यात आले. पाच दिवस उपचार घेतल्यानंतर शुक्रवारी सारिकाचा मृत्यू झाला. या प्रकरणी बेलतरोडी पोलिसांनी आकस्मिक मृत्यूची नोंद केली. गेल्या पाच दिवस सारिका बेशुद्ध असल्यामुळे पोलिसांना तिचे मृत्यूपूर्व बयाण (डीडी) घेता आले नाही. त्यामुळे पती-पत्नीत नेमका काय वाद होता, हे निश्‍चित कळू शकले नाही, अशी माहिती बेलतरोडी पोलिसांनी दिली.