नागपूर : नागरिकांकडून कर वसुलीसाठी आता अधिकाऱ्यांना रविवार तसेच सुटीच्या दिवशीही काम करावे लागणार आहेत. त्यामुळे अधिकाऱ्यांवर अतिरिक्त कामासोबत सुटीच्या दिवशीही कामाचे दडपण दिसून येत आहेत. आयुक्त तुकाराम मुंढे यांच्यापुढेही तोकड्या मनुष्यबळाचे आव्हान आहे. गेल्या काही वर्षांपासून राज्य सरकारकडे धूळखात असलेल्या मनपाच्या पदभरतीचा प्रस्ताव ते मंजूर करण्याचे कौशल्य दाखविणार की मागील आयुक्तांप्रमाणेच सर्वसाधारण काम करीत नागपुरातून जाणार, असा प्रश्‍न चर्चिला जात आहे. 

महापालिकेत दर महिन्याला 20 ते 25 अधिकारी व कर्मचारी निवृत्त होत असून, अनेकांनी स्वेच्छानिवृत्तीसाठी अर्ज केले आहेत. निवृत्त अधिकारी, कर्मचाऱ्यांची कमतरता भरून काढण्यासाठी मनपा सभागृहाने 17 हजार पदांचा आकृतिबंध मंजूर करून सरकारकडे मंजुरीसाठी पाठविला आहे. मात्र, दोन वर्षांपासून हा प्रस्ताव धूळखात आहे. आयुक्त तुकाराम मुंढे यांनी महापालिकेत येताच शिस्तीचा बडगा उगारला. आधीच तोकड्या मनुष्यबळामुळे कामाचा ताण असलेल्या अधिकारी व कर्मचाऱ्यांवर आता आयुक्तांच्या कारवाईचेही दडपण आहे.

अवश्य वाचा - वडिलांची प्रकृती खराब झाली अन्‌ रुग्णालयातील महिलेशे जुळले सुत, मग केले हे...

आयुक्तांनी शिस्त लावावी, परंतु तोकड्या मनुष्यबळाचा विचार करता शासनाकडून पदभरतीचा प्रस्ताव मंजूर करून आणण्याचे कौशल्यही दाखवावे, अशी चर्चा आता अधिकाऱ्यांत रंगली आहे. शहरात स्वच्छतेवर भर दिला जात आहे. परंतु, 17 हजार पदांच्या आकृतिबंधात सफाई कर्मचाऱ्याची 8,660 पदेही रखडली आहे. अधिकाऱ्यांकडून आयुक्तांच्या अपेक्षा वाढल्या आहेत. अधिकाऱ्यांच्याही आयुक्तांकडून पदभरतीच्या अपेक्षा आहेत. परंतु, आयुक्तांपुढे बोलणार कोण, असा प्रश्‍न आहे. 

सत्ताधाऱ्यांनी याबाबत पाठपुरावा करणे गरजेचे आहे. मात्र, विकासकामे रोखल्याने सत्ताधारीच गलितगात्र झाल्याचे चित्र आहे. आयुक्तांनी आता पदभरतीकडे लक्ष देण्याची गरज काही अधिकाऱ्यांनी व्यक्त केली. परंतु, मनपाचे उत्पन्न यात अडथळा ठरत असल्याचे एका अधिकाऱ्याने नमूद केले. संपूर्ण आकृतिबंधानुसार भरती केल्यास महापालिकेवर 50 कोटी रुपये प्रतिमहिन्याचा ताण पडण्याची शक्‍यता आहे. महापालिकेची आर्थिक स्थिती बिकट असून, उत्पन्नवाढीसाठी आयुक्तांनी कुठलेही प्रयत्न केले नसल्याबाबतही आश्‍चर्य व्यक्त होत आहे. मनपाचा आकृतिबंध केवळ औपचारिकता ठरू नये, अशी अपेक्षा अधिकारी करीत आहेत.

सविस्तर वाचा - काय राव कसं काय? त्याने मारली शेतमजुराच्या पाठीवर थाप

आकृतिबंधातील अधिकारी, कर्मचाऱ्यांची संख्या

शासनाकडे प्रलंबित आकृतिबंधात पदांची संख्या 17 हजार 334 आहे. यात उपायुक्तांची 7, शहर अभियंता 9, कार्यकारी अभियंता (स्थापत्य)-28, प्रोजेक्‍ट मॅनेजर -1, उपअभियंता (स्थापत्य) -94, कनिष्ठ अभियंता 302, निरीक्षक-233, स्थापत्य अभियांत्रिकी सहायक-448, मलेरिया सर्व्हे वर्कर-100, सुरक्षारक्षक-440, क्षेत्र कर्मचारी-500, रोड सफाई कर्मचारी-8660, पोलिस कॉन्स्टेबल-45 यासह अन्य पदांच्या संख्येतही वाढ करण्यात आली आहे.