नागपूर : रामटेकच्या धनुष्यबाणाला दिल्लीत पोहचवण्याचे आटोकाट प्रयत्न मुख्यमंत्री एकनाथ शिंदे करीत असले तरी महाविकास आघाडीचे श्याम बर्वे यांच्या माध्यमातून सुनील केदार यांनी मोठे आव्हान उभे केले आहे. वंचितचा कुकर किती प्रेशर आणतो आणि बसपाचा हत्ती किती धावतो यावर महायुतीचे राजू पारवे यांचे भवितव्य अवलंबून राहणार आहे.

रामटेकमधील काँग्रेसचे उमेदवार बर्वे यांची निवडणूक माजी मंत्री सुनील केदार यांनी आपल्या खांद्यावर घेतली आहे. त्यामुळे अनेक जण धास्तावले आहेत. मुख्यमंत्र्यांनी उमरडेमधून काँग्रेसचे आमदार पारवे यांच्या हाती धनुष्यबाण दिला आहे. या लढ्यात भाजपची सेना त्यांच्यासोबत आहे. मुख्यमंत्र्यांनी रामनवमीनिमित्त मतदारसंघातील विविध मंदिरांना भेटी देऊन जय श्रीरामाचा नारा दिला.

सुमारे दहा दिवस ते रामटेकमध्ये होते. पंतप्रधान नरेंद्र मोदी यांनीही कन्हानमध्ये सभा घेतली. यावरून ही निवडणूक हायव्होल्टेज असल्याचे दिसते. केदारांच्या मदतीसाठी कन्हैय्या कुमार यांचा अपवाद वगळा कोणी नेता आला नाही. काँग्रेसचे प्रदेश उपाध्यक्ष किशोर गजभिये यांनी बंडखोरी केली. त्यांना वंचित बहुजन आघाडीने समर्थन जाहीर केले आहे. प्रकाश आंबेडकर यांनी दोन सभा त्यांच्यासाठी घेतल्या. बसपाच्या मायावती यांनी नागपूरमध्ये विदर्भातील सर्व उमेदवारांसाठी सभा घेतली. संदीप मेश्राम येथे हत्तीवर आरुढ आहेत. या दोन्ही उमेदवारांच्या मतविभाजनावरच विजय अवलंबून राहणार आहे. येथून सर्वाधिक २८ उमेदवार रिंगणात आहेत.