मेहकर - अनेकविध गुन्ह्यांच्या प्रकरणी राज्यातील कारागृहांमध्ये हजारो कैदी शिक्षा भोगत आहेत.त्यांच्यात वैचारिक, मानसिक परिवर्तन घडवून आणण्यासाठी वारकरी विचारसंहिता परिषदेकडून राज्य शासनाला कारागृहांमध्ये कीर्तनांचे कार्यक्रम करण्याबाबतचा प्रस्ताव देण्यात आला होता.त्याबाबत शासनाने सकारात्मक प्रतिसाद दिल्याने कारागृहांमध्ये कीर्तनाचा गजर निनादणार आहे .

या प्रक्रियेची सुरुवात म्हणून नागपूर येथील कारागृहात सोमवारी ता.१७ रोजी पहिला कीर्तनाचा शुभारंभाचा प्रयोग होणार असल्याची माहिती, वारकरी विचारसंहिता परिषदेचे प्रवर्तक निलेश महाराज झरेगाववकर यांनी येथे दिली.

क्रमाक्रमाने राज्यातील सर्व ६० कारागृहांमध्ये कीर्तनाचा गजर होणार आहे.देशातील सहाव्या क्रमांकाचे नृसिंह पीठ मेहकर येथे ज्ञानमंदिरात आहे.आज निलेश महाराज यांनी गुरुपीठाला भेट देऊन आशीर्वाद घेतले .त्यावेळी त्यांनी वरील महत्वाच्या उपक्रमाची माहिती दिली.

ऍड.रंगनाथ महाराज पितळे यांनी त्यांना गुरुपीठाकडून आशीर्वाद दिले.नृसिंह संस्थानचे विश्वस्त आशिष उमाळकर यांनी सत्कार केला. कैद्यांच्या विचारसरणीत वारकरी संप्रदायाच्या कीर्तन परंपरेतून सकारात्मक बदल घडवून आणण्याच्या प्रयत्नांचा एक भाग म्हणून कारागृहांमध्ये कीर्तनाचा गजर करण्यात येणार असल्याचे निलेश महाराज म्हणाले.

राज्यात ९ मध्यवर्ती तर ३१ जिल्हा कारागृहे असून १९ खुले आणि एक महिला कारागृह असे ६० कारागृह आहेत.त्यांची क्षमता २५ हजार असतांना प्रत्यक्षात ४१ हजार कैदी आहेत.

त्यांच्यात वैचारिक ,मानसिक परिवर्तन घडविण्यासाठी प्रत्येक कारागृहात प्रबोधनात्मक कीर्तने करण्याचा प्रस्ताव परिषदेकडून राज्य शासनाला देण्यात आला होता.त्याला शासनाने सकारात्मक प्रतिसाद दिला असून पहिला कीर्तनाचा गजर नागपूर कारागृहात सोमवारी होणार आहे,अशी माहिती निलेश महाराज यांनी दिली.