नागपूर - कर्ज आणि सावकार महिलेकडून होणाऱ्या त्रासाला कंटाळून एका विवाहित महिलेने गळफास घेऊन आत्महत्या केल्याची खळबळजनक माहिती पुढे आली आहे. यामुळे मात्र, तिची वर्षभराची चिमुकली मातृछत्र हरवून बसली आहे. वाडी पोलिस ठाण्याअंतर्गत येणाऱ्या आठवा मैल परिसरात ही दुर्दैवी घटना घडली. छळणाऱ्या सावकार महिलेविरुद्ध कठोर कारवाई करण्याची मागणी कुटुंबीयांनी केली आहे.

कीर्ती राहुल मेश्राम (२८) असे मृत विवाहितेचे नाव आहे. ती मंडपे ले आउट वॉर्ड क्रमांक ३ मध्ये भाड्याच्या घरात पती व एक वर्षाच्या मुलीसह राहत होती. पोलिसांनी दिलेल्या माहितीनुसार परिसरात राहणाऱ्या ओळखीच्या महिलेकडून काही दिवसाअगोदर ३० हजार रुपयांचे कर्ज घेतले होते. या रक्कमेवरील व्याज वाढत गेले.

कर्ज देणारी महिला सावकार वारंवार तिच्या घरी पैशाची मागणी करीत होती. आज सकाळी पुन्हा ती महिला घरी आली. वाद घातला. काही वेळाने कीर्तीने मुलीला जवळच राहणाऱ्या आई-वडिलांकडे सोडले व परत घरी येऊन दुपारी तीन वाजताच्या सुमारास छताच्या हुकला ओढणीच्या साहाय्याने गळफास घेऊन आत्महत्या केली.

घटनेची माहिती पती राहुल मेश्राम व पोलिसांना देण्यात आली. माहिती मिळताच पोलिस पथक घटनास्थळी पोहचले. पंचनामाकरून मृतदेह उत्तरीय तपासणीसाठी नागपूर येथील शासकीय रुग्णालयात पाठविण्यात आला. अधिक तपास पोलिस करीत आहे.