यवतमाळ : गेल्या दोन वर्षांपासून टॉवरग्रस्त शेतकऱ्यांना मोबदला न देता, टॉवरचे काम पूर्ण करणाऱ्या पॉवरग्रिडच्या अधिकाऱ्यांचा खासदार बाळू ऊर्फ सुरेश धानोरकर यांनी चांगलाच "क्‍लास' घेतला. येत्या 15 दिवसांत शेतकऱ्यांचे पुर्नमुल्याकन करून मोबदला देण्याबाबतही त्यांनी खडसावले.
येथील जिल्हाधिकारी कार्यालयात शनिवारी (ता. 15) ही बैठक झाली. वरोरा ते परळी, वरोरा ते हैदराबाद येथे वीज घेऊन जाण्यासाठी पॉवरग्रिडने टॉवर उभारले आहेत. त्यात वणी, घाटंजी व आर्णी तालुक्‍यांत अनेक शेतकऱ्यांच्या शेतात मनोरे उभारण्यात आले आहेत. त्यातील अनेक मनोऱ्यांचे काम पूर्ण झाले आहे. मात्र, शेतकऱ्यांना त्यांचा मोबदला मिळालेला नाही. या प्रश्‍नावर खासदार धानोरकर यांनी जिल्हाधिकारी अजय गुल्हाने यांच्यासमवेत पॉवरग्रिडच्या अधिकाऱ्यांची बैठक घेतली. शेतकऱ्यांच्या पिकांचे पुर्नमूल्यांकन करून त्यांना योग्य पीक मोबदला देण्यात यावा, साहित्यांची ने-आण करताना ज्यांच्या शेतातून वाहतूक होत आहे, अशा शेतकऱ्यांना मदत देण्याचे निर्देशही खासदार धानोरकर यांनी दिले. वणी, घाटंजी व आर्णी तालुक्‍यांतील शेतकऱ्यांचे प्रश्‍न 15 दिवसांत निकाली काढण्याचे आदेशही धानोरकर यांनी दिले. या बैठकीला माजी मंत्री शिवाजीराव मोघे यांच्यासह शेतकरी उपस्थित होते.