अमरावती : कुणी कुणाशी लग्न करावे याचे प्रत्येकाला स्वातंत्र्य आहे. परंतु तू माझी होणार नसशील तर दुसऱ्याची होऊ नये, यासाठी तिच्या होणाऱ्या पतीला धमकी देऊन त्याने लग्न मोडले. लग्न केले तर तिच्या चेहऱ्यावर ऍसिड फेकून चेहरा विद्रूप करेल, अशी धमकीसुद्धा त्याने दिली. पोलिसांनी धमकी देणाऱ्या टवाळखोराविरुद्ध शनिवारी (ता. 25) गुन्हा दाखल केला. 

मोहंमद अबरार (वय 28, रा. अमरावती) याची संबंधित युवतीसोबत ओळख होती. तो नेहमी रस्त्यात अडवून युवतीला माझे तुझ्यावर प्रेम आहे, असे म्हणून तिचा छळ करीत होता. पीडितेने सततच्या त्रासाबद्दलची माहिती आपल्या भावाला त्याचवेळी दिली. भावाने मो. अबरार याची समजूत काढली. भविष्यात त्रास देणार नाही, असे आश्‍वासन त्याने पीडितेच्या भावास दिले. या कालावधीत 26 वर्षीय युवती बंगळूरला नोकरीसाठी गेली. मो. अबरारला पुन्हा तिची आठवण झाली. त्याने नवीन मोबाईल क्रमांकावरून तिच्यासोबत संपर्क साधणे सुरू केले. न बोलल्यास स्वत:च्या जिवाचे बरेवाईट करून घेईल, अशी धमकी त्याने दिली. पीडित युवती ही धमकीला घाबरून पुन्हा मो. अबरारसोबत बोलू लागली. या कालावधीत युवतीचे लग्न एका युवकासोबत जुळले. 

अवश्य वाचा- अमरावतीत हे काय चाललंय! पोलिसच पोलिसांपासून नाही सुरक्षित...

ती दोन महिन्यांपूर्वी अमरावतीत आली. त्याने पुन्हा तिच्याशी संपर्क साधून लग्न करण्याचा आग्रह धरला. तिने स्वत:चे लग्न ठरल्याची जाणीव मो. अबरारला करून दिली. मात्र, त्याने तिच्या होणाऱ्या पतीसोबत संपर्क साधून आपले त्याच्या होणाऱ्या पत्नीसोबत प्रेमप्रकरण असल्याचे सांगितले. लग्न केल्यास तिच्या चेहऱ्यावर ऍसिड फेकून चेहरा विद्रूप करेल, अशी धमकी दिली. त्यामुळे तिचे लग्न मोडले. अखेर पीडितेने शनिवारी (ता. 25) फ्रेजरपुरा ठाण्यात धाव घेऊन तक्रार नोंदविली. पोलिसांनी मोहंमद अबरार विरुद्ध गुन्हा दाखल करून त्याला अटक केली. 

अवश्य वाचा- तिला माहीत होतं आपण मरणार! तरी नियतीला शरण न जाता मिळविले ७५ टक्के गुण

घटनाक्रम महिला अत्याचाराशी संबंधित असल्याने पीडितेच्या तक्रारीची तत्काळ दखल घेऊन गुन्हा दाखल करण्यात आला. 
-पुंडलिक मेश्राम, पोलिस निरीक्षक, फ्रेजरपुरा ठाणे.  
 

संपादन - राजेंद्र मारोटकर