सिरोंचा(गडचिरोली) : वनकर्मचाऱ्यांनी गस्तीवर असताना सागवान लाकडांची तस्करी करणाऱ्या पाच बैलबंड्यांसह २ लाखांचा मुद्देमाल जप्त केला. याप्रकरणी पाच आरोपींना ताब्यात घेण्यात आले आहे. तिरुपती राजम पुल्लुरी, पोचम दुर्गय्या पुल्लुरी, मलय्या पोचम पुलगंटी, वेंकटी समय्या आईला, तिरुपती पोचम गुंडेटी सर्व रा. नगरम अशी ताब्यात घेतलेल्या आरोपींची नावे आहेत.

प्राप्त माहितीनुसार, शुक्रवारी रात्री वनकर्मचारी गस्तीवर असताना बैलबंडीद्वारे सागवान लाकडांची तस्करी होत असल्याची माहिती वनकर्मचाऱ्यांना मिळाली. वनकर्मचाऱ्यांनी सिरोंचा ते मंडलापूर मार्गावर सापळा रचला असता,तस्कर पाच बैलबंडंयांमधून सागवान लाकडे वाहून नेताना आढळून आले. वनकर्मचाऱ्यांना पाहताच आरोपी अंधाराचा फायदा घेत आजूबाजूच्या शेतात दडून बसले.

वनकर्मचाऱ्यांनी त्यांना ताब्यात घेऊन बैलबंडीची पाहणी केली असता त्यामध्ये ३४ नग सागवान लाकडे आढळून आली. या मालाचे मोजमाप करून ७१ हजार ९१४ रुपये किमतीचे १.११९ घनमीटर सागवान लाकूड व १ लाख १७ हजार ५०० रुपये किमतीचे बैल व बंडी असा एकूण १ लाख ८९ हजार ४१४ रुपयांचा मुद्देमाल जप्त केला. पाचही आरोपींवर वनगुन्ह्याअंतर्गत शनिवारी (ता. २६) गुन्हा दाखल करण्यात आला आहे.

सविस्तर वाचा -  चविष्ट आणि चटपटीत स्वयंपाकासाठी टीप्स

ही कारवाई सिरोंचाचे उपवनसंरक्षक सुमीतकुमार, सहायक वनसंरक्षक एस. जी. बर्डेकर यांच्या मार्गदर्शनात सिरोंचाचे वनपरिक्षेत्र अधिकारी वि. वा. नरखेडकर, क्षेत्र सहायक बी. एम. खोब्रागडे, चिटूरचे क्षेत्र सहायक एस. जे. खरतड, वनरक्षक बी. एम. नरोटे, संरक्षण पथकातील वनपाल दिलीप कौशिक, एस. एस. खोब्रागडे, रामने, वाहनचालक चौधरी यांनी केली. पुढील तपास वनपरिक्षेत्र अधिकारी नरखेडकर करीत आहेत.

संपादन - स्वाती हुद्दार