आर्णी : जीवाची लाही लाही करणारं उनं रोजच्या दिवसाला तापत आहे. 46 डिग्रीच्या वरील तापमान घेऊन दिवसाची सुरुवात होत आहे. त्यामुळे मानवी जीवन कमालीचे विस्कळीत झालेले आहे. अशा दिवसात बाहेर देवदर्शनाला जाणे एका उपवर मुलीच्या मृत्यूचे कारण ठरले आहे.

आर्णी तालुक्यातील भंडारी जहागीर येथील रघुनाथ शिंदे यांची मुलगी कल्पना हिचा विवाह तालुक्यातील परसोडा येथील अनिल सोळंके या मुलाशी ठरला होता. मार्च महिन्यात त्यांचा साखरपुडा झाला. 20 फेब्रुवारी 2020 लग्नाची तारीख निश्चित झाली. त्यांच्या परंपरेनुसार मुलीचे लग्न जुळल्यावर देवकार्य पार पाठण्यासाठी कुलदैवताच्या पायथ्याशी जावे लागते. त्यामुळे 25 एप्रिलला खासगी गाडी करून उपवर मुलीसोबत आई वडील, काका काकु, दोन भाऊ, आजी हे कोल्हापूर, जेजुरी, नातेपोते, नाथबाबा येथे गेले होते. उपवर मुलीचे लग्नापूर्वीचे दैविक कार्य आटोपून घरी परत येत असताना कल्पनाला उलट्या येऊ लागल्या म्हणून तुळजापूर येथील खासगी रूग्णालयात दाखल करून उपचार करून घराकडे निघाले.

प्रवासात तिचा त्रास वाढला. तेव्हा नांदेड पोहचले होते. तिला नांदेड येथील खासगी रुग्णालयात दाखल करण्यात आले. तिथे उपचार केला परंतु उष्माघाताचा आघात जास्त असल्यामुळे तिच्यावर उपचार होऊ शकला नाही. अखेर तिचा मंगळवारी (ता.30 एप्रिल) मृत्यू झाला.

देवदर्शनाला गेलेल्या उपवर मुलीचा उष्माघाताने बळी घेतला. या घटनेमुळे कल्पना व अनिल यांच्या कुटुंबीयांवर दुःखाचा डोंगर कोसळला. ही घटननेमुळे परिसरात हळहळ व्यक्त करण्यात येत आहे.