साखरखेर्डा (जि.बुलडाणा) : सिंदखेडराजा तालुक्यातील रानअंत्री येथील एक शेतकरी महिला शेतात काम करीत होती. शेतातील काडीकचरा वेचत असतानाच शेजारच्या झुडपातून अचानक तिला आवाज आला.

सध्या खरीप पेरणी जवळ आल्यामुळे बहुतेक शेतकरी कुटुंबासह शेतीच्या पेरणीपूर्व मशागतीस मग्न आहे. आज सकाळी रान अत्री येथील शेतकरी रामेश्वर केवट पत्नी मीना केवट आणि दोन मुलांसह शेतात काम करण्यासाठी गेले. शेतातील काडीकचरा वेचत असतानाच शेजारच्या झुडपातून अचानक एक रानडुकर आले. त्याला पाहताच महिलेने आरडाओरडा केला व पतीच्या दिशेने धावली. पतीकडे धावत असताना रानडुकराने मागून येऊन महिलेवर हल्ला केला व जखमी केले.

हेही वाचा - अरेरे काय ही हलगर्जी! क्वारंटाईन सेंटर बाहेरच घडत आहे असा प्रकार...वाचून व्हाल थक्क

रानडुकरांच्या या हल्ल्यात महिलेच्या मांडीला कडाडून चावा घेतला. यात सदर महिला जखमी झाली. महिलेला रानडुकरांच्या तावडीतून सुटका करण्यासाठी इतर शेतकरी हातात लाठ्याकाठ्या घेऊन रानडुकरांच्या दिशेने धावले. लोकांचा घोळका पाहून रानडुकराने जंगलात पलायन केले. आज पासून मृग नक्षत्र लागले असून शेतकरी शेतीच्या पेरणीपूर्व मशागतीसाठी शेतात काम करीत आहे. मात्र, जंगली प्राण्यांचा शिरकाव आता गाव कुसात मोठ्या प्रमाणात वाढला असल्याने शेतकऱ्यांच्या सुरक्षेचा प्रश्न ऐरणीवर आला आहे. 

महत्त्वाची बातमी - तीन महिने कळा शोषून अकोलेकरांनी काय धडा घेतला?

परिसरात निलगायींनी (रोही) संख्या मोठ्या प्रमाणावर वाढली असून त्यांचा शेतातील उपद्रव वाढला असल्याने पिकांचे मोठ्या प्रमाणावर नुकसान होत आहे. त्याच बरोबर रानडुकराची संख्याही मोठ्या प्रमाणात वाढली असून ते शेतातील पिकांचे मोठे नुकसान तर करतातच पण शेतात काम करणाऱ्या शेतकरी, शेतमजुरांवर सरळ हल्ला करीत आहेत. या रानडुकरांचा आणि निलगायीचा वनविभागाच्या अधिकाऱ्यांनी बंदोबस्त करावा अशी मागणी रान अंत्रीसह परिसरातील शेतकऱ्यांनी केली आहे.