HDFC बँकेच्या नेट बँकिंगमध्ये घोळ; ग्राहकांच्या तक्रारीनंतर बँकेचं स्पष्टीकरण

नवी दिल्ली : सर्वांत मोठी प्रायव्हेट बँक असलेल्या HDFC बँकेच्या नेट बँकिंग आणि मोबाईल बँकिंगच्या सेवेत आज मंगळवारी समस्या निर्माण झाली आहे. बँकेच्या युझर्सना नेट बँकिंग एक्सेस करण्यामध्ये अडचणी येत आहेत. याबाबत आता बँकेने दुजोरा देत एक वक्तव्य जाहीर केलं आहे. त्यात बँकेने या अडचणीवर काम केले जात असून त्यावर लवकरच मात केली जाईल, असं म्हटलं आहे. बँकेच्या अनेक ग्राहकांनी सेवेमध्ये आलेल्या अडचणींबाबत सोशल मीडियावर तक्रारी लिहल्या होत्या. त्यामुळे बँकेने ट्विट करत माहिती दिलीय की, आमच्या काही ग्राहकांना नेटबँकिंग आणि मोबाईल बँकिंग करण्यात अडचणी येत आहेत. आम्ही यावर तातडीने काम करत असून लवकरच त्यावर उपाय शोधू. या तसदीबद्दल आम्ही दिलगिरी व्यक्त करतो. थोड्या वेळानंतर आपण पुन्हा या सेवेचा अडथळ्याशिवाय लाभ घेऊ शकाल. 

एका युझरने ट्विटरवर बँकेला टॅग करुन म्हटलंय की, एचडीएफसीचे नेटबँकिंग सुस्थितीत काम करत नाहीये. आर्थिक वर्ष समाप्तीला असताना आजचा दिवस महत्त्वाचा आहे. तर दुसऱ्या एका युझरने विचारलं की, आपला हा इश्यू कधी सोडवला जाणार आहे? आपण याचं उत्तर देऊ शकणार आहात का?

दुसऱ्या एका युझरने लिहलंय की, HDFC चे नेटबँकिंग आणि मोबाईल बँकिंग गेल्या तीन तासांपासून थांबलेले आहे. याआधी देखील याप्रकारची अडचण निर्माण झाली होती. रिझर्व्ह बँकेने त्यावेळी HDFC बँकेवर याबद्दल दंड देखील ठोठावला होता. 

हेही वाचा - आठ बँकांच्या खातेदारांनो, १ एप्रिलपासून नियम बदलणार!

गेल्या दोन वर्षांच्या दरम्यान HDFC बँकेच्या सेवेमध्ये अडचणी निर्माण झाल्याचे पाहून डिसेंबरमध्ये रिझर्व्ह बँकेने प्रायव्हेट सेक्टरमधील बँकेवर नवीन डिजीटल बँकिगची सुरवात करण्यासाठी आणि नवे क्रेडिट कार्ड जारी करण्यावर बंदी आणली होती. सेवेमध्ये गडबड निर्माण झाल्याने HDFC बँकवर दोनवेळा दंड देखील लगावला आहे.