पंजाब नॅशनल बॅंकेला ३८०० कोटींचा फटका

मुंबई - सार्वजनिक क्षेत्रातील पंजाब नॅशनल बॅंकेने (पीएनबी) आणखी एक गैरव्यवहार झाल्याची माहिती रिझर्व्ह बॅंकेला दिली आहे. भूषण पॉवर अँड स्टील या कंपनीच्या थकीत कर्जांशी संबंधित (एनपीए) विविध शाखांतून तब्बल ३ हजार ८०५ कोटींचा गैरव्यवहार झाल्याचे ‘पीएनबी’ने म्हटले आहे. 

यापूर्वी हिरेव्यापारी नीरव मोदी याने बनावट कागदपत्रांच्या आधारे बॅंकेची १३ हजार ७०० कोटींची फसवणूक केली होती. या बड्या गैरव्यवहारातून बॅंक सावरत नाही तोच दुसरा गैरव्यवहार उघड झाल्याने बॅंकांच्या कॉर्पोरेट कर्ज वितरणाच्या कार्यपद्धतीवर प्रश्‍नचिन्ह निर्माण झाले आहे. ‘पीएनबी’ला शनिवारी (ता. ६) हा गैरव्यवहार झाल्याचे निदर्शनास आले. चंडिगड येथील कॉर्पोरेट शाखेत ३ हजार १९१ कोटी, दुबईतील शाखेत ३४५.७४ कोटी आणि हाँगकाँग येथील शाखेत २६७.९० कोटींचा गैरव्यवहार झाल्याचे समोर आले असून, बड्या १२ कर्जबुडव्यांपैकी एक असलेल्या भूषण पॉवर अँड स्टील कंपनीने ताळेबंदात फेरफार करून बॅंकांकडून कर्जे घेतली आहेत. कर्जाची रक्कम इतरत्र वळवल्याचा आरोप बॅंकेने केला आहे. न्यायसाहाय्यक हिशेब तपासणी अहवालात (फॉरेन्सिक ऑडिट) हा गैरव्यवहार उघड झाल्याची माहिती बॅंकेकडून देण्यात आली.