QR Code Vending Machine : RBI ची क्यूआर कोड कॉईन व्हेंडिंग मशीन कशी काम करणार

QR Code Vending Machine : भारतीय रिझर्व्ह बँकेने आज चलनविषयक धोरण समितीचे निकाल जाहीर केले आहेत.

रेपो दरात वाढ करण्यासोबतच यावेळी आरबीआयकडून बँकिंग आणि वित्तीय क्षेत्रासाठीही काही घोषणा करण्यात आल्या आहेत.

यावेळी आरबीआयचे गव्हर्नर शक्तिकांत दास म्हणाले की, आरबीआयची क्विक रिस्पॉन्स कोडवर आधारित नाणे वेंडिंग मशीन बसवण्याची योजना आहे.

सेंट्रल बँक क्यूआर कोडवर आधारित कॉईन व्हेंडिंग मशीन सुरू करण्यासाठी पायलट प्रोजेक्ट सुरू करण्याचा निर्णय घेतल्याचेही त्यांनी यावेळी सांगितले.

नाण्यांचा वापर सुलभ करण्यासाठी हे केले जाणार असून, नवीन QR-कोड आधारित पायलट प्रोजेक्ट म्हणून, ग्राहकांना UPI सुविधेद्वारे याचा फायदा होणार आहे. सुरुवातीच्या काळात भारतातील 12 शहरांमध्ये ही सुविधा सुरू केली जाणार आहे.

आरबीआयच्या या पाऊलाकडे एक धोरणात्मक निर्णय म्हणून बघितले जात असून, यामुळे भारतीय देयकांना फायदा होणार आहे.

अशी काम करणार QR कोड आधारित नाणे वेंडिंग मशीन

• रिझर्व्ह बँक ऑफ इंडिया 12 शहरांमध्ये QR कोड आधारित कॉईन वेंडिंग मशीनवर (QCVM) पायलट प्रोजेक्ट सुरू करणार आहे.

• व्हेंडिंग मशीन बसवल्यानंतर ग्राहकांना एटीएम कार्डऐवजी क्यूआर कोड वापरून नाणी काढता येतील.

• ही व्हेंडिंग मशीन ग्राहकाच्या खात्यातून डेबिट झाल्यावर नाणी वितरीत करेल.

• व्हेंडिंग मशीन बँक नोटांच्या प्रत्यक्ष पैशांऐवजी UPI वापरून नाणी वितरीत करेल. यामुळे नाण्यांची उपलब्धता सुलभ होणार आहे.

• या मशीन्सचा वापर करून नाण्यांच्या वितरणास प्रोत्साहन देण्यासाठी बँकांना मार्गदर्शक तत्त्वे जारी केली जातील असेही दास यांनी यावेळी सांगितले.