लिपस्टीक 

डोंबिवलीत ट्रेनमध्ये शिरल्यावर त्यांनी जागा पकडल्या. त्यानंतर त्यांचं बोलणं सुरू होतं. त्या प्रत्येक वेगळ्या विषयांत त्यांच्या ब्युटी प्रॉडक्टबद्दल चर्चा व्हायची. विषय नोकरीचा असेल तर ऑफिसातल्या बायका कशा आणि कुठल्या शेड्स वापरतात. काही साईट ऑफिसमध्ये बंद आहेत, या वाक्यानंतर ब्युटी प्रॉडक्टची नवीन साईट मला कळलीय...तिथे जास्त कन्सेशन मिळतं...हे आणि असंच.

पहिली मुलगी: मी xxx ब्रॅण्डची लिपस्टीक मॅटमध्ये शोधतेय.

दुसरी मुलगी: अमुक ठिकाणी चांगली मिळेल.

पहिली मुलगी: मी xxxx ऐवजी yyyy ब्रँडची लिपस्टीक बघत होते पण...ती xxx ब्रँडमध्ये चांगली आहे. मी घेतली एकदा लावली तर ओठ ड्राय झाले. रात्री लिपस्टीक काढली तर दोन दिवस ओठ झोंबत होते. बहुतेक मॅट लिपस्टीकमुळे ओठ ड्राय होतात; पण याने जास्त त्रास झाला.

ती सांगत होती, ऑफिसात सर्वजणी तशीच लिपस्टीक लावतात पण त्यांना त्रास होत नाही...बहुधा त्या लिपस्टीकमुळे त्यांच्या ओठांचं सेन्सेशन खराब झालं असणार म्हणून त्यांना त्रास होत नाही...

दुसरी मुलगी: अग मॅट लिपस्टिक लावायच्या आधी मॉश्चरायजर लावायचं...

पहिली मुलगी: लावलं होतं.

दुसरी मुलगी: लिपस्टीक लावल्यानंतर पण लावायचं.

पहिली मुलगी: लावलं होतं तरी ओठ जळजळले...

बापरे, त्यानंतर पुन्हा त्या वेगवेगळ्या ब्रॅण्डच्या स्वस्तातल्या लिपस्टिक ऑनलाईन शोधत होत्या आणि स्वस्तातल्या लिपस्टीकबद्दल बोलत होत्या. 

मला थोडा वेळ वाटलं का एवढा अट्टाहास? लिपस्टिक नाही परवडत तर नका लावू किंवा महागडी एखादीच लिपस्टिक ठेवा ज्याने त्रास नाही होणार. पण सुंदर दिसण्यासाठी केवढा हा स्वतःशी खेळ. त्या तिघी एकाच बॅचच्या इंजिनिअर होत्या. त्यांच्या बोलण्यावरुन ते लक्षात येत होतं. 

इंटर्नशिप करत होत्या. 

एक क्षण वाटलं अशी एकादी लिपस्टिक असती जी लावल्यावर बायकांचे ओठ चिकटले असते तर डब्यात थोडावेळ तरी शांतता असती. मग ती मॅट असो नाही तर ग्लॉसी...पण अशी लिपस्टीक असली पाहिजे...असो...

(मुंबईतल्या लोकलमध्ये प्रवास करताना वेगवेगळ्या व्यक्ती, वल्ली आणि समुह समोरून झरझर सरकत असतात. या व्यक्ती, वल्ली आणि समुहांच्या चर्चा, मतं कानावर आदळत असतात. त्यातून मनातल्या मनात विचारांची आंदोलनं उसळत असतात. ती मांडणारा हा ब्लॉग...आपल्याला नियमित ब्लॉग लिहायचाय? आम्हाला ई मेल करा webeditor@esakal.com वर. Subject लिहाः BLOG)