आम्ही कोरोनामुक्त अन् निरोगी! नायडू रुग्णालयातून घरी सोडलेल्या दांपत्यांचा अभिप्राय

पुणे - आम्ही कोरोनामुक्त झालो. निरोगी होऊन आता घरी जात आहोत. इतर रुग्णही कोरोनामुक्त होतील, असा विश्वास कोरोनापासून मुक्त झालेला दांपत्यांनी बुधवारी व्यक्त केला. या  कोरोनामुक्त या दांपत्यांना आज रुग्णालयातून घरी सोडण्यात आले.

हिंदू नवीन वर्षाच्या पहिल्याच दिवशी पाडव्याला हे दांपत्य नवी गुढी उभारण्यासाठी खडखडीत बरे होऊन घरी गेले. गेले 16 दिवस ते महापालिकेच्या नायडू रुग्णालयातील विलगीकरण कक्षात उपचार घेत होते. तेथून बाहेर पडताना नायडू रुग्णालायातील अभिप्रायात हा विश्वास व्यक्त केला.

सिंहगड रस्त्यावरील दांपत्य आपल्या सहजीवनाचे रौप्यमहोत्सवी वर्ष साजरे करण्यासाठी दुबई सहलीला गेला होते. जगभरात थैमान घातलेल्या कोरोना विषाणूंचा संसर्ग त्यांना तेथे झाला. होळीच्या दिवशी, 9 मार्चला त्यांना कोरोनाचा संसर्ग झाल्याचे निदान झाले. तेव्हापासून ते येथील विलगीकरण कक्षात उपचार घेत होते. 

“आम्ही वैद्यकीय सल्ल्याचे तंतोतंत पालन केले. आता आमच्या दोन्ही चाचण्या निगेटिव्ह आल्या आहेत. आम्ही कोरोनामुक्त झालो आहोत. निरोगी झालो आहोत. कोरोनाचा संसर्ग झालेले इतर रुग्णही निश्चित बरे होतील. ते निरोगी होऊन घरी जातील. याची खात्री आहे,” असेही त्यांनी अभियाप्रात म्हटले आहे.

वैद्यकीय सल्ल्याचे तंतोतंप पालन केल्यास कोरोनामुक्त होऊ शकतो. तसेच, पतंप्रधान, मुख्यमंत्री, आरोग्य मंत्री, सरकारी यंत्रणा यांनी दिलेल्या सूचनांप्रमाणे वागल्यास आपला देशही कोरोनामुक्त होईल, अशी भावनाही त्यांनी यात व्यक्त केली आहे. 

आरोग्य सेवकांचे आभार
नायडू रुग्णालयातील सर्व वैद्यकीय तज्ज्ञ, परिचारिका, कर्मचारी, बी. जे. वैद्यकीय महाविद्यालयाचे अधिष्ठाता, तज्ज्ञ डॅक्टर यांचे मनःपूर्वक आभारही या दांपत्याने मानले आहेत.