Mumbai Crime: पत्नीच्या चारित्र्यावर संशय म्हणून पतीने चाकूने वार करुन केली हत्या

Mumbai Crime : मालवणीत पत्नीची पतीकडून चाकूने वार करून हत्या करण्यात आली आहे. सपना श्रवण राऊत असे या महिलेचे नाव असून तिच्या हत्येप्रकरणी पती श्रवण राऊतला मालवणी पोलिसांनी अटक केली आहे.

चारित्र्याच्या संशयावरून ही हत्या झाल्याचे स्पष्ट झाले आहे. श्रवण हा त्याची पत्नी सपना आणि तीन मुलांसोबत मालाडच्या मालवणी, पटेलवाडीत राहत होता.

तो सपनाच्या चारित्र्यावरून संशय घेत होता, त्यातूनच गेल्या दोन-तीन दिवसांपासून या दोघांमध्ये सतत खटके उडत होते. आज (ता. ४) सकाळी पावणेबारा वाजता सपना बाथरूममध्ये गेली होती. त्यावेळी श्रवणने पत्नीवर चाकूने वार केले होते. त्यामध्ये ती गंभीररीत्या जखमी झाली होती.

ही घटना पोलिसांनी समजताच घटनास्थळी जाऊन रक्तबंबाळ अवस्थेत सपना यांना कांदिवलीतील शताब्दी रुग्णालयात दाखल केले, मात्र डॉक्टरांनी त्यांना मृत घोषित केले. त्यानंतर काही काळातच पती श्रवणला पोलिसांनी ताब्यात घेतले.

मालवणी येथून बीट मार्शल आंबेकर, जाधवर यांनी चौकशीसाठी पतीला ताब्यात घेतल्यानंतर त्याने घडलेली घटना सांगितली. यावेळी त्यांनी आपण स्वतःच पत्नीची हत्या केल्याचे कबूल केले.