Crime News: शौचास गेलेल्या 13 वर्षीय दलित मुलीस शेतात जिवंत जाळले, पोलीस काय म्हणाले?

लखनऊ- शौचास गेलेल्या एका १३ वर्षीय दलित मुलीला जीवंत जाळल्याची धक्कादायक घटना समोर आली आहे. उत्तर प्रदेशातील बलरामपूरमधील हराईया गावातील ही घटना आहे. पोलिसांनी यासंदर्भातील माहिती दिली आहे. मुलीला कशा पद्धतीने आणि का जाळण्यात आले याचा शोध घेतला जात असल्याचं पोलिसांनी सांगितलं. (Minor Dalit girl)

अतिरिक्त पोलीस अधीक्षक योगेश कुमार यांनी सांगितलं की, मुलगी सायंकाळच्या सुमारास गावाजवळच्या शेतात शौचास गेली होती. एक तासानंतर देखील ती परत न आल्याने कुटुंबियांनी शोध सुरु केला. त्यावेळी काही गावकऱ्यांनी सांगितलं की, जवळच्या शेतामध्ये आग लागली आहे. कुटुंबीय शेतात पोहोचल्यानंतर त्यांना मुलीचा जळलेल्या अवस्थेतील मृतदेह आढळून आला. हे सर्व पाहून कुटुंबियांना धक्काच बसला.

योगेश कुमार यांनी दिलेल्या माहितीनुसार, मुलीचे जळालेले शरीर पोस्टमार्टमसाठी पाठवण्यात आले आहे. पोलीस याप्रकरणी अधिक तपास करत आहेत. तपासानंतरच यावर अधिक भाष्य करता येईल. दरम्यान, सदर घटनेमुळे परिसरात एकच खळबळ उडाली आहे. सदर प्रकरणी तपास करुन दोषींवर कारवाई व्हावी अशी मागणी केली जात आहे.