Ashadi Wari 2023 : चालों वाटें आम्हा तुझाचि आधार! पंढरीकडे निघालेला वैष्णवाचा सोहळा बारामतीत मुक्कामी

बारामती : सकाळपासून दुपारपर्यंत उन्हाचा तडाखा… जेवणानंतर ऊन आणि सावलीचा खेळ… बारामतीजवळ पावसाचा किरकोळ शिडकावा… त्यानंतर पंढरीकडे निघालेला वैष्णवाचा सोहळा बारामतीत मुक्कामी सुखावला. दरम्यान, सोहळा उद्या इंदापूर तालुक्यात प्रवेश करणार आहे. संत तुकाराम महाराज यांचा यंदाच्या पालखी सोहळ्याच्या वाटचालीतील आजचा नववा दिवस आहे.

‘जेथें जातों तेथें तू माझा सांगाती।’ या अभंगात संत तुकाराम महाराज म्हणतात, हे विठुराया आम्हाला तूच आमचा हात धरून चालवतोस. जून महिना निम्मा संपला अद्याप पाऊस नाही. ऊन खूप आहे. चालताना त्रास होतोय, पण विठुराया तू दाखविलेल्या मार्गाने आम्ही चालत आहोत. तूच आमच्या पाठीशी खंबीरपणे आहेस. अशी अपेक्षा ठेऊन वारकऱ्यांची वाटचाल सुरू आहे.

उंडवडी ग्रामस्थांच्या वतीने पादुकांना अभिषेक करण्यात आला. चोपदार नामदेव गिराम यांनी सूचना करताच सोहळा बारामतीच्या दिशेने मार्गस्थ झाला. उंडवडीच्या पठारावर सोहळ्याने पहिला विसावा घेतला. बऱ्हाणपूर फाटा येथे दुपारच्या विसाव्यासाठी सोहळा बारा वाजता पोचला. ग्रामस्थांनी मुख्य रस्त्यावर मांडव उभारला होता.

दुपारी जेवण केल्यानंतर सोहळा बारामतीकडे चालू लागला. मोरेवाडी येथे विसावा घेत पालखी सोहळा संध्याकाळी बारामतीच्या बाजारपेठेत आला. यावेळी, देशमुख चौकात विरोधी पक्षनेते अजित पवार यांनी पुष्पहार अर्पण करून पादुकांचे सपत्नीक दर्शन घेतले. नंतर सातच्या सुमारास शारदा मंदिराच्या प्रांगणात मुक्कामी विसावला.