Mahashivratri 2023 :जाणून घ्या कधी आहे यंदा महाशिवरात्री...

महाशिवरात्री हा हिंदूंचा सर्वात मोठा सण आहे. दक्षिण भारतीय दिनदर्शिकेनुसार (अमावस्यंत पंचांग) हा सण माघ महिन्याच्या कृष्ण पक्षाच्या चतुर्दशीला साजरा केला जातो. दुसरीकडे, उत्तर भारतीय पंचांग (पौर्णिमांत पंचांग) नुसार, फाल्गुन महिन्याच्या कृष्ण पक्षाच्या चतुर्दशीला महाशिवरात्रीचे आयोजन केले जाते. या दिवशी शिवभक्त शिवलिंगावर बेल-पान वगैरे अर्पण करून पूजा, उपवास करतात आणि भगवान शंकराची मनोभावे पूजा करतात.

हिंदू दिनदर्शिकेनुसार, फाल्गुन महिन्यातील कृष्ण पक्षातील चतुर्दशी तिथीला महाशिवरात्री हा सण साजरा केला जातो. महाशिवरात्रीची चतुर्दशी तारीख 18 फेब्रुवारी 2023 रोजी रात्री 08:02 वाजता सुरू होईल आणि 19 फेब्रुवारी 2023 रोजी दुपारी 04:18 वाजता समाप्त होईल. 

निशिता काळात महाशिवरात्रीची पूजा केली जाते.यावेळी, महाशिवरात्री, 18 फेब्रुवारी 2023 रोजी शनिवारीच शनि प्रदोष व्रत आणि मासिक शिवरात्रीही साजरी केली जात आहे. प्रदोष व्रताच्या दिवशीही भगवान शिव आणि माता पार्वतीची पूजा केली जाते. प्रदोष व्रत महिन्यातून दोनदा पाळले जाते.सकाळी लवकर उठून आंघोळ करून स्वच्छ वस्त्र परिधान करून देवासमोर हात जोडून महाशिवरात्री व्रताची प्रतिज्ञा घ्यावी. यानंतर शिवमंदिरात जाऊन शिवलिंगाला अभिषेक करा, पूजा करा. 

जर तुम्ही घरी पूजा करत असाल तर नियमानुसार शुभ मुहूर्तावर पूजा करा. घरी देखील देवघर स्वच्छ करावे. ते स्थान गंगाजलाने पावन करावे. मातीच्या भांड्यात पाणी किंवा दूध भरून त्यावर बेलपत्र, आक-धतुरा, तांदूळ इत्यादी टाकून ते शिवलिंगाला अर्पण करावे. जवळपास शिवमंदिर नसेल तर घरात मातीचे शिवलिंग बनवून पूजा करावी. फळे आणि मिठाईचा नैवेद्य घ्यावा.