महिला इंजिनिअरची विचित्र तक्रार! म्हणे, तिला एक अदृश्‍य शक्ती...

मध्य प्रदेशातील (Madhya Pradesh) बैतूलमध्ये एका महिला उपअभियंत्याची विचित्र तक्रार पोलिसांपर्यंत (Police) पोहोचली आहे. या महिला उपअभियंत्याने पोलिसांत तक्रार दिली आहे की, कोणीतरी अदृश्‍य शक्ती (Invisible Power) तिला त्रास देत आहे आणि तिच्या टिफीनमधील भाजी खात आहे.

कोतवाली टीआय रत्नाकर हिंगवे यांनी दिलेल्या माहितीनुसार, बैतूल येथील पंतप्रधानंत्री रस्ता योजनेत काम करणारी महिला उपअभियंता श्रुती झाडे हिने 2 डिसेंबर रोजी कोतवाली पोलिसांकडे अर्ज केला आणि सांगितले की, काही अदृश्‍य शक्ती तिला त्रास देत आहे. टिफीनमध्ये ठेवलेली भाजीही ही अदृश्‍य शक्ती खात असल्याचा आरोप उपअभियंता श्रुती झाडे यांनी केला आहे.

गेल्या काही दिवसांपासून तिच्या दागिन्यांचे वजनही कमी झाले असून, त्याशिवाय तिचे पैसे आणि कपडेही चोरीला गेल्याचा आरोप उपअभियंत्याने केला आहे. महिला उपअभियंत्याने दावा केला, की त्या अदृश्‍य शक्तीचे पाय तिला दिसतात. उच्चशिक्षित आणि अभियांत्रिकी क्षेत्रात कार्यरत असलेल्या एका महिलेने ही तक्रार केल्याने पोलिसांना आश्‍चर्याचा धक्काच बसला आहे.

कोतवाली टीआय रत्नाकर हिंगवे सांगतात की, श्रुती झाडे यांना समजावून सांगण्यात आले आहे की, ती सांगत आहे तशी कोणतीही वस्तुस्थिती समोर आली नाही आणि ती तिच्या मनाची शंका आहे. सध्या या महिलेच्या या अजब तक्रारीची सर्वत्र चर्चा होत आहे.