Live मुलाखतीतच अमित शाह म्हणाले, "..हा बोलण्याचा विषय नाही"

गुजरातमधल्या दंगली या राजकीय हेतूने प्रेरित होत्या, असं सांगत अमित शाह यांनी एका लाईव्ह मुलाखतीत आपल्यावरच्या आरोपांबद्दल स्पष्टीकरण दिलेलं आहे. तसंच त्यांनी पंतप्रधान नरेंद्र मोदी यांच्यावर गुजरात दंगल प्रकरणात लागलेल्या आरोपांबद्दलही भाष्य केलं आहे. पण या लाईव्ह मुलाखतीत एक असा विषय झाला, ज्यामुळे त्यांनी मुलाखत घेणाऱ्या पत्रकाराला मधेच थांबवलं आणि थेट विषयच बदलला.

पंतप्रधान नरेंद्र मोदी यांना गुजरात दंगल प्रकरणात मिळालेली क्लिनचिट कायम राहिली आहे. नुकतंच क्लिनचिट विरोधात दाखल कऱण्यात आलेल्या याचिकेत न्यायालयाने मोदींच्या बाजूने निर्णय दिला आहे. या सगळ्या संदर्भात ही मुलाखत सुरू होती. या मुलाखतीत पंतप्रधान नरेंद्र मोदी यांच्यावर लावले गेलेले आरोप खोटे होते, त्यांच्या बदनामीसाठी करण्यात आले होते, असं अमित शाहांनी स्पष्ट केलं. त्यामागची कारणं आणि त्या वेळच्या परिस्थितीबद्दलही माहिती दिली.

पुढे विषय गोध्रा हत्याकांडाकडे वळला. या हत्याकांडामध्ये मृतदेहाची परेड करण्यात आली, या आरोपाबद्दलही विचारण्यात आलं. त्यावेळी हे आरोप अमित शाह यांनी फेटाळले आहेत. या हत्याकांडाबद्दल अनेक ठिकाणी चर्चा झाल्या, आधीही मोदींना क्लिनचिट मिळाल्याचंही त्यांनी सांगितलं. मला त्यावेळी जेलमध्ये टाकलं ते माझ्या चांगल्यासाठीच होतं, मी भाग्यवान होतो, असंही अमित शाह म्हणाले. त्यावेळी तुम्हाला माहित होतं का की तुम्ही जेलमधून निर्दोष मुक्त होणार आहात? असा प्रश्न विचारला असता लाईव्ह मुलाखतीतच अमित शाह म्हणाले की, आजच्या मुलाखतीचा विषय माझी केस नाहीये. आजची मुलाखत एका मोठ्या प्रभावशाली नेत्याबद्दल, एका मुख्यमंत्र्याबद्दल आहे. मी कायमच नरेंद्र मोदींसोबत आहे. ही सत्याची लढाई आहे, मला ती लढायचीच आहे.