काँग्रेस नेते शशी थरूर यांच्याविरुद्ध अटक वॉरंट जारी

कोलकता : काँग्रेसचे खासदार शशी थरूर यांच्याविरुद्ध बंकशल न्यायालयाने आज अटक वॉरंट जारी केले. थरूर यांनी गेल्या वर्षी केलेल्या "हिंदू पाकिस्तान' या विधानाबद्दल हे वॉरंट काढण्यात आले आहे. ऍड. सुमीत चौधुरी यांनी दाखल केलेल्या खटल्याच्या आधारे महानगर दंडाधिकाऱ्यांनी हे वॉरंट जारी केले. 

शशी थरूर यांना अनेकदा समन्स पाठवण्यात आले होते. मात्र, थरूर न्यायालयापुढे हजर न झाल्यामुळे हे वॉरंट काढण्यात आल्याचे कळते; मात्र त्याला दुजोरा मिळाला नाही. "भाजपने 2019 ची लोकसभा निवडणूक जिंकल्यास ते "हिंदू पाकिस्तान'सारखी स्थिती निर्माण करतील,' असे विधान थरूर यांनी गेल्या वर्षीच्या जुलैमध्ये केले होते.

तिरुअनंतपुरमधील सभेत बोलताना, भाजप घटनेत बदल करेल आणि तेथे अल्पसंख्यकांना किंमत नसेल, असेही ते म्हणाले होते.