Ayodhya Ram Mandir : ''तरुणांनो, आपली मशीद आपण गमावली...'' राम मंदिरावरुन ओवैसी काय म्हणाले?

हैदराबादः अयोध्येत रामजन्मभूमीवर भव्य राम मंदिर उभं राहात आहे. येत्या २२ जानेवारी रोजी रामलल्ला गर्भागृहात विराजमान होणार आहेत. पंतप्रधान नरेंद्र मोदी यांच्या प्रमुख उस्थितीत हा सोहळा संपन्न होणार आहेत. जसजसं अयोध्येतील सोहळा जवळ येत आहे तसं राजकीय विधानं जोर धरु लागली आहेत.

एमआयएमचे प्रमुख आणि हैदराबादचे खासदार असदुद्दीन ओवैसी यांनी राम मंदिराच्या उद्घाटनापूर्वी एक मोठं विधान केलं आहे. त्यांचं स्टेटमेंट सोशल मीडियावर व्हायरल झालं आहे. या व्हिडीओमध्ये ते तरुणांना पाठिंबा आणि ताकद कायम ठेवण्याचं आवाहन करताना दिसून येत आहेत.

व्हिडीओमध्ये ओवैसी म्हणतात, तरुणांनो आपण आपली मशीद गमावली आहे. तिथे काय केलं जात आहे, ते आपण बघत आहोत. तुम्हाला याचा त्रास होत नाही? जिथे आपण ५०० वर्षे बसून कुराण-ए-करीमचं पठण केलं, आज ती जागा आमच्या हातामध्ये नाही.

ते पुढे म्हणतात, तरुणांनो, आणखी तीन ते चार मशिदींबाबत षड्यंत्र सुरु आहे. ज्यामध्ये दिल्लीतल्या मशिदीचाही समावेश आहे. या शक्ती तुमच्या मनातून ऐक्य काढून टाकण्याचा प्रयत्न करत आहेत. अशी परिस्थिती तुम्हाला पाहिजे आहे का? या गोष्टीकडे आपण गांभीर्याने बघितलं पाहिजे.

असदुद्दीन ओवैसी पुढे म्हणतात, तुमची ताकद आणि तुमची एकता कायम ठेवा. मशिदी लोकवस्तीत ठेवा. कारण या मशिदी आपल्याकडून काढून घेतल्या जातील. आजचे तरुण उद्या म्हातारे होणार आहेत. त्यामुळे आपण स्वतःला, कुटुंबाला आणि शहराला कशी मदत करु शकतो, याचा विचार केला पाहिजे.