Bageshwar Dham : मोठी बातमी! बागेश्वर धामचे बाबा धीरेंद्र शास्त्रींच्या भावाला अटक; पोलिसांवर होता दबाव

बागेश्वर धामचे बाबा धीरेंद्र शास्त्री (Bageshwar Dham Dhirendra Shastri) यांचा भाऊ शालिग्राम गर्ग (Shaligram Garg) याला छतरपूर पोलिसांनी आज (गुरुवार) अटक केली. आरोपीला अटक करून छतरपूर जिल्हा न्यायालयात हजर करण्यात आलंय.

11 फेब्रुवारीला बमिठा येथील गढा गावात एका दलित कुटुंबातील मुलीचा विवाह होता. पंडित धीरेंद्र शास्त्री यांचा भाऊ शालिग्राम यानं दारूच्या नशेत लग्नात प्रचंड गोंधळ घातला. त्याचा व्हिडिओ सोशल मीडियावर व्हायरल झाला होता. यामध्ये तो हातात पिस्तुल आणि तोंडात सिगारेट घेऊन गोंधळ घालताना दिसला.

धीरेंद्र शास्त्री यांचा भाऊ शालिग्राम गर्ग याला अटक करण्यासाठी छतरपूर पोलिसांवर (Chhatarpur Police) प्रचंड दबाव होता. शालिग्रामच्या अटकेच्या मागणीसाठी दलित संघटना सातत्यानं आंदोलन करत होत्या. गावातील वातावरणही पूर्णपणे तंग झालं होतं. प्रचंड वादानंतर धीरेंद्र शास्त्री यांनीही भावापासून फारकत घेतली होती. प्रत्येक प्रकरणात आपलं नाव ओढण्याची गरज नाही, असं निवेदन त्यांनी जारी केलं होतं.

छतरपूरचे एसपी सचिन शर्मा यांनी या प्रकरणी एक निवेदन जारी केलं होतं की, 'पोलीस लवकरच या प्रकरणी अहवाल सादर करेल. आता शालिग्राम गर्ग याला अटक करण्यात आलीये. न्यायालयाच्या भूमिकेकडं आमचं लक्ष असणार आहे. न्यायालय काय निर्णय देतं हे पाहावं लागेल.' शालिग्रामनं लग्नाच्या कार्यक्रमात पिस्तुल घेऊन गोंधळ घातल्याचा व्हिडिओ व्हायरल झाल्यानंतर पंडित धीरेंद्र शास्त्री यांच्यावरही टीका होऊ लागली होती.