अभिनेता भूषण कडूच्या पत्नीचं कोरोनामुळे निधन

मराठी कलाविश्वातील लोकप्रिय अभिनेता भूषण कडू (bhushan kadu) याच्या पत्नीचं कोरोनामुळे (covid19) निधन झालं आहे. ठाण्यातील एका रुग्णालयात उपचार सुरु असतांना तिची प्राणज्योत मालवली. काही दिवसांपूर्वी भूषण आणि पत्नी कादंबरी या दोघांना कोरोनाची लागण झाली होती. (bhushan-kadu-wife-kadambari-39-passes-away-due-to-covid19)

अभिनेता भूषण कडू व पत्नी कादंबरी या दोघांना कोरोना झाल्यानंतर त्यांच्यावर उपचार सुरु होते. भूषण बोरीवलीमधील एका रुग्णालयात अॅडमिट होता. तर, कादंबरीची प्रकृती खालावल्यामुळे तिला ठाण्यातील रुग्णालयात दाखल करण्यात आलं होतं. कोरोना काळात अनेक कलाकारांवर आर्थिक संकट कोसळलं असून भूषणदेखील आर्थिक तंगीने त्रस्त होता. या काळात त्यांना उपचारांकरता मदतीची गरज होती. म्हणूच, सोशल मीडियावर भूषण कडू आणि त्याची पत्नी कादंबरी यांच्या आर्थिक मदतीसाठी मेसेजदेखील फिरत होते.

दरम्यान, कादंबरी कोरोनावर मात करण्यास अशस्वी ठरली आणि २९ मे २०२१ रोजी तिची प्राणज्योत मालवली. भूषण व कादंबरी यांना प्रकिर्त नावाचा एक लहान मुलगा असून कादंबरीदेखील कलाविश्वाशी निगडीत होती. नाटकाचं बॅक स्टेज ती सांभाळायची. भूषण व कादंबरी या दोघांच ओळख एका नाटकादरम्यान झाली होती.