मोठी बातमी! बिहारचे कृषिमंत्री सुधाकर सिंह यांचा तडकाफडकी राजीनामा

पाटणा : बिहारची राजधानी पाटणा (Bihar Patna) येथून मोठी बातमी समोर येत आहे. बिहार सरकारमधील कृषी मंत्री आणि आरजेडी आमदार सुधाकर सिंह (Sudhakar Singh) यांनी मंत्रीपदाचा राजीनामा दिलाय. गेल्या काही दिवसांपासून बिहारच्या राजकारणात आपल्या वक्तव्यांमुळं चर्चेत असलेल्या सुधाकर सिंह यांनी बिहारचे उपमुख्यमंत्री तेजस्वी यादव (Tejashwi Yadav) यांच्याकडं आपला राजीनामा सुपूर्द केलाय.

कृषिमंत्री सुधाकर सिंह हे बिहार आरजेडीचे (RJD) प्रदेशाध्यक्ष जगदानंद सिंह यांचे पुत्र असल्याची माहिती आहे. नितीशकुमार यांच्या नेतृत्वाखाली स्थापन झालेल्या सरकारमध्ये त्यांना कृषिमंत्री करण्यात आलं. सुधाकर सिंह यांनी मंत्रीपदाचा राजीनामा दिल्याच्या वृत्ताला त्यांचे वडील आणि आरजेडीचे प्रदेशाध्यक्ष जगदानंद सिंह यांनी दुजोरा दिलाय.

महागठबंधन सरकारमध्ये सुधाकर सिंह आरजेडी कोट्यातून मंत्री झाल्याची माहिती आहे. सुधाकर सिंह यांनी आपल्याच सरकारविरोधात बंड पुकारलं होतं. सुधाकर सिंह यांनी खुल्या व्यासपीठावरून बिहार सरकारच्या कृषी विभागाच्या अधिकाऱ्यांना चोर म्हटलं होतं. त्यांच्या या वक्तव्यावरून बराच गदारोळ झाला होता. आज त्यांनी आपल्या पदाचा तडकाफडकी राजीनामा दिला.