Rajasthan : राज्यात बनावट नोटांविरोधात मोठी कारवाई, पोलिसांनी दीड कोटींच्या नोटा केल्या जप्त

बिकानेर : राजस्थानमध्ये (Rajasthan) बनावट नोटांविरोधात (Fake Note) मोठी कारवाई करण्यात आलीय. बिकानेर पोलिसांनी (Bikaner Police) शनिवारी रात्री जयनारायण व्यास कॉलनी पोलीस ठाण्याच्या हद्दीत छापा टाकून बनावट नोटांच्या काळ्या धंद्याचा पर्दाफाश केलाय. पोलिसांनी सुमारे दीड कोटी रुपयांच्या बनावट नोटा जप्त केल्याचं सांगण्यात येतंय.

बिकानेर रेंजच्या आयजींनी स्वतः ही छापेमारी कारवाई केलीय. रात्री उशिरापर्यंत ही कारवाई सुरू होती. याप्रकरणी किती आरोपींना अटक करण्यात आली आणि किती रुपयांच्या नोटा जप्त करण्यात आल्या, याबाबत पोलिसांनी अद्याप खुलासा केलेला नाहीय.

पोलीस सूत्रांनी दिलेल्या माहितीनुसार, शनिवारी रात्री बिकानेर शहरातील पॉश कॉलनी JNVC पोलीस स्टेशन परिसरात बनावट नोटांविरोधात ही कारवाई करण्यात आलीय. बिकानेर रेंजचे आयजी ओम प्रकाश (IG Om Prakash) यांच्या नेतृत्वाखाली पोलिसांनी छापा टाकून घटनास्थळावरून मोठ्या प्रमाणात बनावट नोटा आणि छापण्याचं मशीन जप्त केलंय. पोलिसांना घटनास्थळी सुमारे दीड कोटी रुपयांची बनावट रोकड सापडलीय. पोलिसांनी बनावट नोटा छापण्यासाठी वापरण्यात आलेलं ब्लॉक मशीन आणि प्रिंटरही जप्त केलंय.

राज्यातील आतापर्यंतची सर्वात मोठी कारवाई

याप्रकरणी पोलिसांनी टोळीशी संबंधित अनेक आरोपींना अटक केलीय. बनावट नोटांवर राज्यातील ही आतापर्यंतची सर्वात मोठी कारवाई असल्याचा दावा आयजी ओम प्रकाश यांनी केलाय. मात्र, रात्री उशिरापर्यंत त्यांनी संपूर्ण कारवाई उघड केली नव्हती. रात्री उशिरापर्यंत पोलीस बनावट नोटा मोजण्यात आणि आरोपींवर कारवाई करण्यात व्यस्त होते. बहुधा रविवारी पोलिसांच्या पत्रकार परिषदेत संपूर्ण प्रकरण उघड होईल.