राम मंदिर घोटाळ्यात भाजप नेते, अधिकारी सामील; प्रियांका-मायावतींचा आरोप

नवी दिल्ली : काँग्रेसच्या महासचिव प्रियांका गांधी (Priyanka Gandhi) यांनी अयोध्येमध्ये राम मंदिराच्या निर्मिती प्रक्रियेमध्ये घोटाळा झाला असल्याचा आरोप केला आहे. प्रियांकांनी दावा केलाय की, राम मंदिर (Ram Mandir Scam)निर्माण ट्रस्टच्या जमीन खरेदी प्रक्रियेमध्ये भ्रष्टाचार झाला आहे. त्यांनी म्हटलंय की, अयोध्येमध्ये दलितांच्या अशाही जमीनी खरेदी केल्या गेल्या आहेत, ज्या खरेदी करण्यास योग्य नव्हत्या.

जमीन खरेदीमध्ये घोटाळ्याचा आरोप

प्रियांकांनी म्हटलंय की, एक जमीन 2 कोटी रुपयांमध्ये खरेदी केली आणि 5 मिनिटांमध्ये खरेदी करणाऱ्या रवी मोहन तिवारी राम मंदिर ट्रस्टला ही जमीन साडेआठ कोटींना विकून टाकली. या विक्रीमध्ये राम मंदिर ट्रस्टचे ट्रस्टी आणि सरसंघचालक अनिल मिश्रा आणि अयोध्येचे महापौर ऋषिकेश उपाध्याय जामीन बनले आहेत. हे घोटाळ्यातील केवळ एक प्रकरण आहे. असे अनेक मामले आहेत. याचसंदर्भात प्रियांकांनी सुप्रीम कोर्टाच्या देखरेखीखाली तपास होण्याची मागणी केली आहे.

राम मंदिराच्या आसापासच्या भागात जमीनींची लूट सुरु आहे. भाजपाचे नेते, योगी सरकारचे अधिकारी या लूटीमध्ये व्यस्त आहेत. हा किती मोठा घोटाळा आहे, याची अद्याप तरी माहिती नाहीये. भगवान श्रीरामाच्या नावावर भ्रष्टाचार केला जातोय. लोकांच्या आस्थेसोबत खेळ केला जातोय.

'मोदी-योगींची नैतिक जबाबदारी'

प्रियांकांनी म्हटलंय की, देशभरातील लोकांनी राम मंदिर ट्रस्टसाठी वर्गणी दिली आहे. त्यामुळे मुख्यमंत्री योगी आदित्यनाथ यांच्यासोबतच पंतप्रधान नरेंद्र मोदींची देखील ही जबाबदारी आहे. लोकांच्या श्रद्धेसोबत खेळ केला गेला आहे. पत्रकार परिषदेत त्या पुढे म्हणाल्या की, सुप्रीम कोर्टाने या प्रकरणाची स्वतःहून दखल घ्यावी आणि या प्रकरणामध्ये हस्तक्षेप करावा. याच प्रकारची मागणी बहुजन समाज पार्टीच्या प्रमुख मायावती यांनीही केली आहे. मायावती म्हणाल्या आहेत की, सुप्रीम कोर्टाने यामध्ये हस्तक्षेप करावा आणि केंद्राने उत्तर प्रदेश सरकारला हे जमिनीचे सौदे रद्द करण्याचे निर्देश द्यावेत.