लक्ष्मीपूजनाने धन मिळालं असतं तर मुस्लीम...; भाजपा नेत्याचं विधान वादात; पुतळा जाळला!

वादग्रस्त विधानांमुळे अनेकदा भाजपाचे नेते चर्चेत येत असतात. दिवाळीच्या तोंडावर असंच एक वादग्रस्त विधान भाजपाच्या एका आमदाराने केलं आहे. त्यामुळे आता मोठा वाद निर्माण होण्याची शक्यता निर्माण झाली आहे. लक्ष्मीपूजनावरुन केलेल्या या विधानावरुन लोकांनी या नेत्याचा पुतळाही जाळला आहे.

बिहारमधल्या भागलपुरातल्या पीरपैंतीमधले भाजपा आमदार ललन पासवान यांनी हे विधान केलं आहे. पासवान म्हणाले, "जर लक्ष्मी पूजनाने धन मिळतं, तर मुसलमान अरबपती, खरबपती झाले नसते. सरस्वती विद्येची देवता आहे. मग मुस्लीम विद्वान झाले नसते, ते आयएएस, आयपीएस नसते." पुढे पासवान म्हणाले की, हनुमान जर शक्तीची देवता आहे आणि शक्ती देतात. तर मुस्लीम किंवा ख्रिश्चन लोक ताकदवान नसतात का? अमेरिकेत हनुमानाची पूजा होत नाही, तरीही तो शक्तिशाली देश कसा काय झाला?

पासवान पुढे म्हणाले, "तुम्ही मानलं तर देव आहे नाहीतर निव्वळ दगड. जोपर्यंत तुम्ही मानता, तोवरच हे आत्मा परमात्मा आहे. मानणं बंद केलं तर बौद्धिक क्षमता वाढेल. असं काही मानण्यापेक्षा तुमच्या तर्कशक्तीने विचार करा. वैज्ञानिक विचार करा." पासवान यांच्या या विधानानंतर त्यांचा व्हिडीओ सोशल मीडियावर व्हायरल होत आहे. संतप्त लोकांनी शेरमारी चौकामध्ये पासवान यांचा पुतळा जाळला आहे.