Boat Accident : अहिल्याबाई घाटातील गंगेत 34 पर्यटकांनी भरलेली बोट बुडाली; घटनास्थळी पोलीस, NDRF दाखल

वाराणसी : जिल्हा प्रशासनाचा हलगर्जीपणा पर्यटकांच्या जिवाशी आला आहे. दक्षिण भारतातील 34 पर्यटकांना (Tourists) घेऊन जाणारी एक ओव्हरलोड बोट शनिवारी सकाळी गंगेत बुडाली आहे.

स्थानिक लोकांनी दिलेल्या माहितीनुसार, बोटींग करत असताना या अपघातात बोटीतील सुमारे 34 जण बुडाले. ही माहिती समजताच एनडीआरएफ (NDRF) आणि पोलिसांचं पथक घटनास्थळी दाखल झालं. दरम्यान, स्थानिक लोकांच्या मदतीनं सर्व पर्यटकांना सुखरूप बाहेर काढण्यात आलं. यातील दोघांची प्रकृती गंभीर असल्यामुळं त्यांना रुग्णालयात दाखल करण्यात आल्याचं पोलिसांनी सांगितलं.

अपघातानंतर आरडाओरडा सुरु होताच लोक आपापल्या साधनांसह बचावासाठी घटनास्थळी पोहोचू लागले. पर्यटकांना एक-एक करून वाचवण्याची प्रक्रिया सुरू झाली, तोपर्यंत दोघांची प्रकृती चिंताजनक असल्यानं त्यांना रुग्णालयात दाखल करावं लागलं. अपघात होत असल्याचं पाहून नियम न पाळणारा बोटचालक घटनास्थळावरून पळून गेला आहे. याप्रकरणी गुन्हा नोंदवून कारवाई करण्याची तयारी पोलिसांनी सुरु केलीय.

वाराणसीमध्ये आज (शनिवार) सकाळी सातच्या सुमारास अहिल्याबाई घाटासमोर (Ahilyabai Ghat) प्रवाशांनी भरलेली बोट अचानक बुडू लागल्यानं मोठा अपघात झाला. गंगेत बोट बुडाल्याची माहिती समजल्यानंतर एकच गोंधळ उडाला. आरडाओरडा सुरु झाल्यानंतर स्थानिक बोटीसह पोलीस आणि बचाव पथक घटनास्थळी पोहोचलं. या दुर्घटनेतील दोघांची प्रकृती गंभीर असल्यामुळं त्यांना तातडीनं कबीर चौरा विभागीय रुग्णालयात दाखल करण्यात आलं आहे.