Bus Accident News : वैष्णोदेवीजवळ भाविकांवर काळाचा घाला; दहा मृत्युमुखी, ५७ जखमी

श्रीनगर/जम्मू : वैष्णोदेवीला जाणारी बस पुलाचे रेलिंग तोडत सुमारे ५० फुट खाली कोसळल्याने दहा भाविक ठार झाल्याची घटना जम्मू-श्रीनगर महामार्गावर झाझ्झर कोटली भागात आज सकाळी सहा ते सातच्या सुमारास घडली. या भीषण अपघातात ५७ जण जखमी झाले आहेत.

दरम्यान, राष्ट्रपती द्रौपदी मुर्मू, नायब राज्यपाल मनोज सिन्हा, उत्तर प्रदेशचे मुख्यमंत्री योगी अदित्यनाथ यांनी अपघाताद्दल दु:ख व्यक्त केले आहे. मृतांत बहुतांश बिहारचे नागरिक आहेत. या अपघाताची माहिती कळताच बचाव पथक, सीआरपीएफ आणि पोलिस पथक घटनास्थळी दाखल झाले. वेगाने बचाव कार्य राबविण्यात आले आणि जखमींना दवाखान्यात दाखल करण्यात आले.

यात चालक जखमी झाला असून त्याच्यासह अन्य प्रवाशांना सीआरपीएफच्या तुकडीने बाहेर काढले. जम्मूतील जीएमसी रुग्णालयात ५७ जणांवर उपचार सुरू आहेत. तसेच दहाही मृतदेह बाहेर काढण्यात आले आल्याचे सीआरपीएफने सांगितले. चालकाचे बसवरील ताबा सुटल्याने अपघात झाल्याचे पोलिसांनी सांगितले. हे प्रवासी माता वैष्णोदेवी मंदिरात बाळाचे जावळ काढण्यासाठी जात होते.

चालकाकडून रस्ता चुकला

वैष्णोदेवीला जाणारी बस कटराला जाण्याऐवजी श्रीनगरच्या दिशेने निघाली. अपघातस्थळाच्या दोन किलोमीटर अगोदरच बसने डावीकडे वळणे अपेक्षित होते, परंतु चालकाच्या लक्षात वळण आले नाही. त्यामुळे बस उधमपूर-श्रीनगरच्या दिशेला गेली.