हा तर दलित महिलांचा अपमान, शिवराजसिंह चौहान यांचा कमलनाथ यांच्यावर हल्लाबोल

भोपाळ- माजी मुख्यमंत्री तथा काँग्रेसचे प्रदेशाध्यक्ष कमलनाथ यांनी महिला बाल विकास मंत्री इमरती देवी यांच्याबद्दल केलेल्या आक्षेपार्ह वक्तव्यावरुन मध्य प्रदेशच्या राजकारणात वादळ उठले आहे. कमलनाथ यांचे वक्तव्य म्हणजे राज्यातील महिलांचा आणि दलित मुलींचा अपमान असल्याचे भाजपने म्हटले आहे. मुख्यमंत्री शिवराजसिंह चौहान यांनी कमलनाथ यांच्यावर हल्लाबोल केला आहे. एक महिला आणि दलित मुलीसाठी अपशब्द वापरणाऱ्या कमलनाथ यांचा धिक्कार आहे. कमलनाथ यांनी हे लक्षात ठेवायला हवे की, हा तो देश आहे जिथे द्रौपदीच्या अपमानामुळे महाभारत झाले होते. राज्यातील जनता त्यांना माफ करणार नाही, अशा शब्दांत चौहान यांनी कमलनाथ यांचा समाचार घेतला. 

मुख्यमंत्री चौहान पुढे म्हणाले की, कमलनाथ यांनी मुख्यमंत्रिपदाचाही अपमान केला आहे. ते याचे प्रायश्चित्त करतील का नाही हे मला माहीत नाही. पण मी मात्र प्रायश्चित्त करणार आहे. दरम्यान, शिवराजसिंह चौहान यांनी कमलनाथ यांच्या वक्तव्याचा निषेध म्हणून दोन तास मौनव्रत धारण केले होते.  

हेही वाचा- कमलनाथ यांचे माजी मंत्री इमरती देवींबद्दल आक्षेपार्ह वक्तव्य, शिवराज चौहान यांचे मौनव्रत

कमलनाथ यांनी डबरा येथील पोटनिवडणुकीच्या प्रचारसभेत इमरती देवी यांना आयटम असे संबोधले होते. त्यावरुन राज्यात नवा वाद सुरु झाला. कमलनाथ यांच्या वक्तव्यामुळे काँग्रेसच्या हातात आयते कोलीत आले आहे. भाजपने आता हा निवडणुकीचा मुद्दा बनवला आहे. डबरा येथून काँग्रेसचे सुरेश राजे हे निवडणुकीसाठी उभे आहेत.  

शिवराजसिंह चौहान यांनी ग्वाल्हेर येथील सभेत कमलनाथ यांच्यावर घणाघाती शब्दांत टीका केली. ज्या पद्धतीची भाषा काँग्रेस वापरत आहे. त्यावरुन त्यांची मानसिकता दिसून येते. त्यांचे नेते महिलांचा किती सन्मान करतात, हे यावरुन दिसून येते. हा केवळ इमरती देवींचा अपमान नाही. हा राज्यातील महिला आणि मुलींचा अपमान आहे. काँग्रेसला काय झाले आहे, हे कळायला मार्ग नाही. कमलनाथ हे मुख्यमंत्री ही होते. ज्या महिलेने वर्षानुवर्षे काँग्रेसची सेवा केली. त्यांच्याबद्दल अशा शब्दांचा प्रयोग करणे म्हणजे गरीब मुलीचा अपमान आहे, असे ते म्हणाले. 

काय म्हटलं होतं कमलनाथ यांनी

सुरेश राजे हे आमचे उमेदवार आहेत. ते अत्यंत सरळ स्वभावाचे व्यक्ती आहेत. ते त्यांच्यासारखे नाहीत. काय आहे त्यांचं नाव ? असे म्हणताच सभेतील गर्दीतून इमरती देवी यांच्या नाव आले. तेव्हा कमलनाथ यांनी मी त्यांचं नाव का घेऊ, तुम्ही माझ्यापेक्षा त्यांना जास्त ओळखता. तुम्ही मला आधीच सावध करायला हवं होतं...हे काय आयटम आहे...हे काय आयटम आहे, असे कमलनाथ यांनी म्हटले होते.