सहकार मंत्रालयाची स्थापना का केली? मोदींनी केला उलगडा

मंत्रिमंडळ विस्तारापूर्वी केंद्र सरकाने सहकार मंत्रालयाची नव्याने निर्मिती केली. या मंत्रालयाची जबाबदारी केंद्रीय गृहमंत्री अमित शाह यांच्यावर सोपवण्यात आली. त्यामुळे राज्यातील सहकाराशी संबंधित उद्योगांवर पकड असलेल्या पक्षांच्या अडचणी वाढतील अशी शक्यता व्यक्त केली जात आहे. यावर विविध स्तरातून प्रतिक्रियाही येत आहेत. पंतप्रधान नरेंद्र मोदी यांनी स्वातंत्र्य दिनाच्या भाषणात सहकार मंत्रालयाबाबतची भूमिका स्पष्ट केली आहे. सहकारवादाचं सशक्तीकरण व्हावं म्हणून विशेष मंत्रालय स्थापन केल्याचं मोदी यांनी आपल्या भाषणात सांगितलं.

सलग आठव्यांदा लाल किल्ल्यावरुन पंतप्रधान नरेंद्र मोदींच्या उपस्थितीत स्वातंत्र्यदिन साजरा करण्यात आला. यावेळी मोदी यांनी देशवासियांना संबोधित करताना सहकार मंत्रालयाबाबत भाष्य केलं. सहकारवाद ही आपली प्रेरणा आहे. सहकारवाद आपल्या परंपरेचा अविभाज्य घटक आहे. सहकारवादाचं सशक्तीकरण व्हावं म्हणून विशेष मंत्रालय तयार करण्यात आलं आहे. सहकार क्षेत्राला जास्तीत जास्त बळ देण्यासाठी आम्ही हे पाऊल उचललं आहे, असे मोदी यांनी सांगितलं.

‘सहकार से समृद्धी’ असे या सहकार मंत्रालयाचे बोधवाक्य आहे. 97 व्या घटनादुरुस्तीनंतर पहिल्यांदाच केंद्र सरकारने सहकार क्षेत्रासाठी मंत्रालयाची स्थापना केली आहे. या खात्याची जबाबदारी अमित शाह यांच्या खांद्यावर सोपवली आहे. आमृतमोहत्सवी स्वातंत्र्य दिनाचे ध्वजारोहण केल्यानंतर पंतप्रधान नरेंद्र मोदी यांनी देशाला संबोधित केलं. यावेळी त्यांनी आपल्या सरकारने केलेल्या कामांचा आढावा दिला. तसेच योजनांमुळे मिळालेल्या यशाचा उल्लेख केला. यावेळी त्यांनी रोजगार निर्मितीसाठी पॅकेज आणि नॅशनल हायड्रोजन मिशनची घोषणा केली. तसेच गरिबांसाठी मोफत तांदूळ, भविष्यातील वाटचाल, शिक्षण योजना अशा अनेक गोष्टींचा उल्लेख आपल्या भाषणात केला....