Corona Update : दिलासादायक परिस्थिती; गेल्या 24 तासांत 22,065 कोरोनाचे नवे रुग्ण 

नवी दिल्ली : गेल्या एक वर्षाहून अधिक काळ कोरोना नावाचा विषाणू संपूर्ण जगभरात धुमाकूळ घालतो आहे. या विषाणूमुळे संपूर्ण जगाची अर्थव्यवस्था कोलमडली होती. दिर्घ अशा लॉकडाऊननंतर काही ठिकाणची परिस्थिती आवाक्यात येत आहे. ब्रिटन देशांनंतर आता अमेरिकेनेही लसीकरणास सुरवात केली आहे. भारतातही लवकरच लशीला मान्यता मिळवून लसीकरणास सुरवात होणार, असल्याची चर्चा आहे.

भारतात गेल्या 24 तासांत 22,065 कोरोनाचे नवे रुग्ण सापडले आहेत. या नव्या रुग्णासंह कोरोनाबाधित रुग्णांची आजवरची एकूण संख्या ही 99,06,165 वर जाऊन पोहोचली आहे. याबाबतची माहिती केंद्रीय आरोग्य मंत्रालयाने दिली आहे. गेल्या 24 तासांत 354 कोरोना रुग्णांचा मृत्यू झाला आहे. या नव्या मृत्यूसह एकूण कोरोना मृतांचा देशातील आकडा हा 1,43,709 वर जाऊन पोहोचला आहे. सध्या देशात एकूण 3,39,820 ऍक्टीव्ह कोरोना रुग्ण आहेत.

गेल्या 24 तासांत 34,477 रुग्ण कोरोनाच्या कचाट्यातून मुक्त झाले आहेत. या नव्या बरे झालेल्या रुग्णांसह एकूण बरे झालेल्या रुग्णांची संख्या ही 34,22,636 वर जाऊन पोहोचली आहे. काल 14 डिसेंबरपर्यंत देशात एकूण 15,55,60,655 कोरोनाच्या चाचण्या केल्या गेल्या आहेत. यातील 9,93,665 चाचण्या काल सोमवारी करण्यात आल्या. याबाबतची माहिती Indian Council of Medical Research (ICMR) ने दिली आहे.